පුදුකුඩුඉරිප්පු උඩයාර්කට්ටු ප්‍රදේශයේ වයස අවුරුදු 12 ක දැරියක ඝාතනය කිරීමේ සිද්ධියක් සම්බන්ධයෙන් සැකපිට ඇයගේ මව , පියා , මස්සිනා හා සහෝදරිය පොලිස් අත්අඩංගුවට ගෙන තිබෙනවා .
අදාල දැරිය අතුරුදන් වී ඇති බවට දෙසැම්බර් 15 වනදා පොලිසියට පැමිණිල්ලක් ලැබී තිබුනු අතර කැලෑ ප්‍රදේශයක තිබී දෙසැම්බර් 18 වනදා ඇයගේ සිරුර හමුවී තිබුනා.
සිද්ධිය සම්බන්ධයෙන් සැකපිට අදාල දැරියගේ මස්සිනා අත්අඩංගුවට පත්වුනේ දෙසැම්බර් 19 වනදායි.
33 හැවිරිදි ඔහු ප්‍රමාණවත් ලෙස තොරතුරු ලබා නොදුන් බැවින් අදාල දැරියගේ මව, පියා හා සහෝදරිය අත්අඩංගුවට ගැනීමට පොලිසිය පියවර ගෙන තිබුනා.
දැරියගේ මව හා පියා 48 යන වයස්වල පසුවන අතර සහෝදරිය 21 වන වියේ පසුවනවා.
ඔවුන්ගෙන් වෙන් වෙන් වශයෙන් කළ ප්‍රශ්ණ කිරීම් වලදී අනාවරණය වී ඇත්තේ මෙය සැලසුම්සහගතව කළ ඝාතනයක් බවයි.
සැකකරුවන් එම ඝාතනය වෙනත් මගකට යොමු කිරීම සදහා පොලීසිය නොමග යැවීමට උත්සහ දැරූ බවද විමර්ශණයේදී අනාවරණය වී තිබෙනවා.
මෙම මනුෂ්‍ය ඝාතනය සම්බන්ධයෙන් අත්අඩංගුවට ගත් අදාල දැරියගේ මස්සිනා මුලතිව් මහේස්ත්‍රාත් අධිකරණයට ඉදිරිපත් කිරීමෙන් පසු ලබන වසරේ ජනවාරි 04 වැනිදා දක්වා රක්ෂිත බන්ධනාගාර ගත කෙරුණා.
12 හැවිරිදි දැරිය ඝාතනයට සම්බන්ධ මව , පියා හා සහෝදරිය අද මුලතිව් මහේස්ත්‍රාත් අධිකරණයට ඉදිරිපත් කිරීමට නියමිතයි. පුදුකුඩුඉරිප්පු පොලිසියයි සිද්ධිය සම්බන්ධයෙන් වැඩිදුර විමර්ශණ මෙහෙයවන්නේ.
