මෙවර සාමාන්‍ය පෙළ විභාගයට පෙනී සිටීමට නියමිත සිසුන් සහ විභාග කාර්ය මණ්ඩල වලට විභාග මධ්‍යස්ථාන වෙත ගමන් කිරීමට විශේෂ වැඩපිළිවෙලක් සකස් කර තිබෙනවා.
ඒ අනුව සිසුන්ගේ ගමන් පහසුව සඳහා සියලූම සිසුසැරිය බස් රථ උපරිම ධාරිතාවයෙන් ධාවනය කරන ලෙස ජාතික ගමනාගමන කොමිෂන් සභාව උපදෙස් දුන් බව ගමනාගමන කොමිසමේ අධ්‍යක්ෂ ජනරාල් කමාන්ඩර් නිලාන් මිරැන්ඩා මහතා කියාසිටියා.
සාමාන්‍ය පෙළ විභාගයට පෙනී සිටින දරුවන්ට සහ කාර්ය මණ්ඩලයේ ගමන් පහසුව තකා ප්‍රමාණවත් ලංගම බස්රථ යෙදවීමට කටයුතු යොදා ඇතැයි ලංකා ගමනාගමන මණ්ඩලය පවසනවා.
එහි සභාපති කිංස්ලි රණවක මහතා පැවසුවේ විභාග කාලසටහන සියලූ ඩිපෝ කලමණාකරුවන් වෙත යවා ඇති බවයි.
ඒ අනූව එහි ඇති කාල වේලාවන් අනූව දිවයින පුරා අමතර ලංගම බස්රථ ධාවනයට එක්කෙරන බවයි කිංස්ලි රණවක මහතා කියා සිටියේ.
කිසිදු බියකින් තොරව විභාග කටයුතු සඳහා සහභාගී වන්නැයි ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න මහතා දන්වා සිටිනවා.
දුම්රිය දෙපාර්තමේන්තුව ප්‍රකාශ කළේ විභාගය පැවැත්වෙන කාලසීමාවලදී නියමිත දුම්රිය කාලසටහන නිසි පරිදි ක්‍රියාත්මක කිරීමට කටයුතු යොදා ඇති බවයි.
