සෞඛ්‍ය උපදෙස් උල්ලංඝණය කිරීම හේතුවෙන් නිරෝධායනයට ගෙන යන කණ්ඩායමක් වෙත තමන් විසින් හෝ තමන්ට සම්බන්ධ කිසිදු පාර්ශවයක් විසින් පහසුකම් සැලසූබව ඔප්පු කලහොත් හෙට දිනයේදී සිය අමාත්‍ය ධූරයෙන් ඉල්ලා අස්වන බව මහජන ආරක්ෂක අමාත්‍ය සරත් වීරසේකර මහතා පවසනවා.
ගුරු විරෝධතා හේතුවෙන් අත්අඩංගුවට ගෙන රදවා සිටි ගුරු වෘත්තීය සමිති සාමාජිකයින් වෙත යාමට තමන්ට සහ විපක්ෂ නායකවරයාට අවස්ථාව ලබා නොදීම සම්බන්ධයෙන් සමගි ජනබලවේගයේ පාර්ලිමේන්තු මන්ත්‍රී නලීන් බණ්ඩාර මහතා සිදුකල ප්‍රකාශයකට පිළිතුරු ලබාදෙමිනුයි අමාත්‍යවරයා මේ බව කියා සිටියේ.
අද පාර්ලිමේන්තුවේ දී ප්‍රකාශයක් කරමින් සරත් වීරසේකර මහතා මෙම අදහස් පළ කලා.
සරත් වීරසේකර අමාත්‍යවරයාගේ ප්‍රකාශයට පිළිතුරු ලබාදෙමින් විපක්ෂ නායක සජිත් ප්‍රේමදාස මහතා අවධාරණය කලේ දේශපාලඥයින් විසින් පොලිසිය ඇතුලූ ආරක්ෂක අංශ හසුරුවමින් කටයුතු කරන බවයි.
එම මර්ධනකාරී සහ කළහකාරී කටයුතු විපක්ෂය තරයේ හෙළා දකින බවද එහිදී විපක්ෂ නායකවරයා කියා සිටියා.
සරත් වීරසේකර අමාත්‍යවරයා කල ප්‍රකාශයට සමගි ජනබලවේගයේ පාර්ලිමේන්තු මන්ත්‍රී නලීන් බණ්ඩාර මහතා ප්‍රතිචාර දැක්වීමත් සමග පාර්ලිමේන්තුවේ හටගත්තේ මෙවන් උණුසුම් තත්වයක්.
