විදෙස් සංචාරකයින්ට මෙරටට ඇතුළු වීමේදී නිර්දේශ කර තිබු අනිවාර්ය පී සී ආර් පරීක්ෂණය අවලංගු කර ඒ වෙනුවට නිකුත් කල නව නිර්දේශය ප්‍රතික්ෂේප කරන බව විශේෂඥ වෛද්‍ය සංගමය අවධාරණය කරනවා.
විදෙස් සංචාරකයින් මෙරටට ඇතුලු වීමේදී, ඔවුන් විසින් රැගෙන එන එන්නත් මාත්‍රා දෙකම ලබා ගත් බවට ඇති සහතිකය සහ රටට ඇතුලු වීමට පෙර පැය 72 කට පෙර ලබා ගත් පීසීආර් පරීක්ෂණ ප්‍රතිඵල පමණක් ප්‍රමාණවත් බවයි මෙම නව නිර්දේශය වන්නේ.
නිවේදනයක් නිකුත් කරමින් විශේෂඥ වෛද්‍ය සංගමය පෙන්වා දෙන්නේ මෙම තත්වය හේතුවෙන් කොවිඩ් වෛරසයේ නව ප්‍රභේද රටට ඇතුළු වීමට ඇති හැකියාව ඉතා ඉහළ බවයි.
ආසාධිතයන් වැඩි වීම මගින් සියල්ලන් සිදුකළ කැපකිරීම් මගින් රෝග පාලනයේ ලබා ඇති ප්‍රගතිය මුළුමනින්ම පාහේ යළි ගිලිහී යාමට ඇති අවදානම අවතක්සේරු කළ නොහැකි බවද ඔවුන් අවධාරණය කරනවා.
මින් පෙරද අසත්‍ය පී සී ආර් වාර්තා සහ අසත්‍ය එන්නත්කරණ වාර්තා ද මෙරට මෙන්ම විදෙස් රටවලද වාර්තාවී ඇති බැවින් නව නිර්දේශය හරහා මෙවැනි භයානක ප්‍රතිඵල වැඩිවිය හැකි බවද සදහන්.
ඒ හේතුවෙන් විශාල වියදමක් දරා ගුවන්තොටුපළ තුළ ඉදිකළ රසායනාගාරය ප්‍රයෝජනයට නොගැනීම හා අනිවාර්ය පී සී ආර් පරීක්ෂණය ඉවත් කිරීම කිසිදු විද්‍යාත්මක පදනමක් මත ගෙන ඇති තීරණයක් නොවන බවයි විශේෂඥ වෛද්‍ය සංගමය නිකුත් කළ නිවේදනයේ වැඩිදුරටත් දැක්වන්නේ.
එහිදී අපේක්ෂිත අරමුණු ද ඉටු කර ගැනීමට නොහැකි බැවින් මෙම මාර්ගෝපදේශ වෙනස් කිරීමට ගත් තීරණ සම්බන්ධව රටේ වගකිව යුතු පුද්ගලයින් විසින් අදාළ විශේෂඥයන් සමග සමාලෝචනයක් කිරීම අත්‍යවශ්‍ය බවත් එමගින් ගන්නා මාර්ගෝපදේශ රටේ සුභසිද්ධිය සඳහා විය යුතු බවත් විශේෂඥ වෛද්‍ය සංගමය අවධාරණය කරනවා.
