සංචාරක ශ්‍රී ලංකා කණ්ඩායම සහ නවසීලන්තය අතර පැවැත්වෙන පළමු ටෙස්ට් තරගයේ අවසන් දිනයට වර්ෂාවෙන් බාධා එල්ල වී තිබේ.
දිවා ආහාරයෙන් අනතුරුව තරගය ආරම්භ කිරීමට සැලසුම් කර තිබුණ ද පවතින අයහපත් කාලගුණික තත්ත්වය හමුවේ තරගය තවමත් ආරම්භ වී නොමැත.
ඊයේ (12) තරගය නතර කරන විට සිය දෙවන ඉනිම සඳහා පන්දුවට පහර දෙමින් සිටි නවසීලන්ත කණ්ඩායම එක් කඩුල්ලක් බිඳ වැටී ලකුණු 28ක් ලබාගෙන සිටී.
ඒ අනුව, තරගය ජයග්‍රහණය සඳහා නවසීලන්ත කණ්ඩායමට තවත් ලකුණු 257ක් අවශ්‍ය වෙයි.
තරගයේ පළමුව පන්දුවට පහරදුන් ශ්‍රී ලංකා කණ්ඩායම පළමු ඉනිම සඳහා ලකුණු 355ක් ලබාගත් අතර ඊට පිළිතුරු ලෙස නවසීලන්ත කණ්ඩායම ලකුණු 373ක් ලබාගත්තේය.
කෙසේවෙතත් දෙවන ඉනිමේ දි ශ්‍රී ලංකා කණ්ඩායමට ලබාගත හැකිවුයේ ලකුණු 302ක් පමණි.
