අගෝස්තු පළමුවැනිදා සිට ක්‍රියාත්මක කිරීමට නියමිත ලන්ච්ශීට් තහනම සදහා මෙරට සුපිරි වෙළදසැල් ජාලය සිය එකගත්වය පළ කර තිබෙනවා.
පරිසර අමාත්‍ය මහින්ද අමරවීර මහතා සමග පැවති සාකච්ඡාවකදී ඔවුන් මෙම එකගත්වය පළ කර ඇති බවයි පරිසර අමාත්‍යාංශය නිකුත් කල නිවේදනයක දැක්වෙන්නේ.
නොදිරණ ලන්ච්ෂීට් මගින් පරිසරයට විශාල හානියක් සිදුවන බවත්, දෛනිකව අප රටේ පරිසරයට ලන්ච්ෂීට් මිලියන 12 ත් 15 ත් දක්වා ප්‍රමාණයක් එක්වන බවත් සුපිරි වෙළදසැල් නියෝජිතයින් සමග පැවති සාකච්ඡාවේදී අමාත්‍යවරයා පෙන්වා දි තිබෙනවා.
පොලිතීන්වලින් නිෂ්පාදිත නොදිරණ ලන්ච්ෂීට් නිෂ්පාදනය, බෙදාහැරීම මෙන්ම අලෙවි කිරීම ලබන අගෝස්තු පළමුවැනිදා සිට තහනම් කිරීමට පරිසර අමාත්‍යාංශය පසුගියදා තීරණය කර තිබුණා.
ඒ අනුව දිවයිනේ සියලු වෙළෙදසැල්වල අලෙවි කළ හැක්කේ දිරාපත්වන ලන්ච්ෂීට් පමණක් වන අතර නොදිරණ ලන්ච්ෂීට් නිපදවීම, බෙදා හැරීම මෙන්ම අලෙවි කිරීම නීතිවිරෝධී ක්‍රියාවක් වන බවයි රජය පෙන්වා දෙන්නේ.
