පාර්ලිමේන්තු මන්ත්‍රී රිෂාඩ් බදියුදීන් ගේ නිවසේ මෙහෙකාර සේවයේ යොදවා සිටිය දී මියගිය 16 හැවිරිදි දැරියගේ දේහය 02 වන පශ්චාත් මරණ පරීක්ෂණය සඳහා ගොඩගෙන පේරාදෙනිය ශික්ෂණ රෝහල වෙත යොමුකර තිබෙනවා.
හැටන් ඩයගම වත්තේ බටහිර කොටසේ පොදු සුසාන භූමියේ දේහය තැන්පත් කර තිබුනා.
නුවරඑළිය මහේස්ත්‍රාත් ලුෂාකා කුමාරි ජයරත්න මහත්මිය හා ත්‍රිපුද්ගල විශේෂ අධිකරණ වෛද්‍යවරුන්ගේ අධීක්ෂණය යටතේයි සිරුර ගොඩගනු ලැබුවේ.
දේහය හදුනාගැනිම සදහා මිනි පෙට්ටිය විවෘත කිරිම සම්බන්ධයෙන් විරෝධතාවක් ඇතිදැයි මහේස්ත්‍රාත්වරිය ඉෂාලිනිගේ ඥාතීන්ගෙන් විමසා සිටි අතර ඔවුන් ඊට විරුද්ධත්වය පළ කළේ නැහැ.
ඒ අනුව දේහය ඥාතීන් විසින් හදුනාගැනිමෙන් පසු දැඩි පොලිස් ආරක්ෂාවක් යටතේ පේරාදෙනිය ශික්ෂණ රෝහල වෙත යොමුකෙරුණා.
අදාල පශ්චාත් මරණ පරීක්ෂණය හෙට දිනයේදි පැවැත්විමට නියමිත බවයි පොලිස් මාධ්‍ය ප්‍රකාශක ජ්‍යෙෂ්ඨ නියෝජ්‍ය පොලිස්පති අජිත් රෝහණ මහතා සදහන් කළේ.
