මෙවර අයවැයෙන් රාජ්‍ය සේවකයින්ට කළ අපහාසය පිලිකුලෙන් යුතුව හෙලා දකින බව විපක්ෂ නායක සජිත් ප්‍රේමදාස මහතා පවසනවා.
රාජ්‍ය සේවය රටට බරක් යැයි මුදල් අමාත්‍යවරයා ඊයේ කල ප්‍රකාශය තරයේ බැහැර කරන බවයි නිවේදනයක් නිකුත් කරමින් විපක්ෂ නායකවරයා අවධාරණය කරන්නේ.
ආණ්ඩුව නියමින් හෝ අනියමින් සූදානම් වන්නේ මෙරට රාජ්‍ය සේවය දියකර හරින්නට බව මෙමගින් පැහැදිලි වන බව එහි වැඩිදුරටත් සඳහන්.
රාජ්‍ය සේවයේ විශ්‍රාම යාමේ වයස අවුරුදු 65 දක්වා ඉහළ නංවන බවට ජනප්‍රිය යෝජනාවක් අයවැයට ඉදිරිපත් කරන අමාත්‍යවරයා, ඊට පසුදිනම රාජ්‍ය සේවය රටට බරක් යැයි පැවසීම මෙවර අයවැයේ විහිලූ සහගත බව විදහාපාන්නක් බවයි විපක්ෂ නායකවරයා පෙන්වා දෙන්නේ.
මැතිවරණ අවස්ථාවලදී ඉහළින්ම තබන රාජ්‍ය සේවකයින්ට, ස්වකීය අරමුණ ඉටු කර ගැනීමෙන් පසු ආණ්ඩුව විසින් මෙලෙස සැලකීම ආණ්ඩුවේ කලගුණ නොදත් ස්වරූපය පෙන්නුම් කෙරෙන්නක් බවද සජිත් ප්‍රේමදාස මහතා නිකුත් කර ඇති නිවේදනයේ සඳහන්.
කිසිදු සැලසුම් සහගත වැඩපිළිවෙළක් නොමැතිව රාජ්‍ය ආයතනවලට බඳවා ගැනීම් සිදු කිරීම මෙවැනි තත්වයකට හේතුව බවයි විපක්ෂ නායකවරයා සිහිපත් කරන්නේ.
සෞභාග්‍යයේ දැක්මෙහි ප්‍රධාන පොරොන්දුවක් මත, රාජ්‍ය සේවයට අලූතින් ලක්ෂයක් බඳවා ගැනීමත් ඊට අමතරව උපාධිදාරීන් 50,000 ක් බදවා ගැනීමෙනුත් සිදුවූයේ රජයේ වැය බර සීඝ්‍රයෙන් ඉහළයාම බවයි සජිත් ප්‍රේමදාස මහතා නිකුත් කර ඇති නිවේදනයේ දැක්වෙන්නේ.
සිදුකල යුතුව ඇත්තේ ඵලදායීතාවයෙන් යුක්ත රාජ්‍ය ආයතන ශක්තිමත් කිරීම බවත් වර්තමානයට ගැලපෙන පරිදි, රාජ්‍ය ආයතනවල ක්‍රියාකාරීත්වය තාක්ෂණික සහ සැලසුම් සහගත ලෙස ප්‍රතිනිර්මාණය කිරීම බවත් විපක්ෂ නායක සජිත් ප්‍රේමදාස මහතා අවධාරණය කරනවා.
