රට දැවැන්ත ආර්ථික අර්බුදයක් කරා ගමන් කරමින් ඇති බව 2020 වාර්ෂික මහබැංකු වාර්තාව මගින් පැහැදිලිව පෙන්වා දී ඇතැයි ජාතික ජන බලවේගයේ නායක පාර්ලිමේන්තු මන්ත්‍රි අනුර කුමාර දිසානායක මහතා අවධාරණය කරනවා.
මහබැංකු වාර්තාව පිළිබද අද පැවති පාර්ලිමේන්තු විවාදයේ යෝජනාව සභාවට ඉදිරිපත් කරමිනුයි ඔහු මේ බව සදහන් කළේ.
මහබැංකු වාර්තාවේ දත්ත හරහා පෙන්වා දෙන මෙරට ආර්ථිකයේ අවදානම් සහගත නැඹුරුව පිළිබදව ගැඹුරු සාකච්ඡාවක් ආරම්භ කළ යුතු බවද අනුර කුමාර දිසානායක මහතා විවාදයේදී පෙන්වා දුන්නා.
මහබැංකු වාර්තාව පිළිබද විවාදයේ යෝජනාව ස්ථිර කරමින් සමගි ජන බලවේගයේ මන්ත්‍රි ආචාර්යය හර්ෂද සිල්වා මහතා විවාදයට එක්වුණා.
එහිදී මන්ත්‍රිවරයා කියා සිටියේ ආනයන සීමා කරමින් හෝ නතර කරමින් ආර්ථික අර්බුදයට විසදුම් සෙවිය නොහැකි බවයි.
යල්පැනගිය මතවාදයන් තුළ සිටිමින් තීරණ ගැනීම රටේ ආර්ථික දියුණුවට බාධාවක් බවද හර්ෂද සිල්වා මහතා පෙන්වා දුන්නා.
රටේ ආර්ථිකය මුහුණදී ඇති අවදානම් තත්වය පිළිබද විපක්ෂය එල්ලකරන චෝදනාවලට මුදල් රාජ්‍ය අමාත්‍ය අජිත් නිවාඩ් කබ්රාල් මහතා විවාදයේදී ප්‍රතිචාර දැක්වුවා. ආර්ථිකය ගොඩනැගීමට විකල්ප සැළසුම් රජය සතුව ඇති බවත් ඒ අනුව යමින් ආර්ථික අර්බුදයට සාර්ථකව මුහුණදෙන බවත් අජිත් නිවාඩ් කබ්රාල් මහතා අවධාරණය කළා.
මේ අද පැවති විවාදයේදී අදහස් දැක්වූ අමාත්‍ය රෝහිත අබේගුණවර්ධන මහතා.
සමගි ජන බලවේගයේ මන්ත්‍රි කබීර් හෂීම් මහතාද 2020 වාර්ෂික මහබැංකු වාර්තාව පිළිබද පාර්ලිමේන්තු විවාදයේදී අදහස් දැක්වුවා.
රටතුළ විනිමය අර්බුදයක් ඇතිකරමින් ඉඩම් ඇතුලු රටේ ජාතික සම්පත් විදේශයන්ට විකුණා දැමීම ආණ්ඩුවේ ආර්ථික ප්‍රතිපත්තිය වී ඇති බවටයි මන්ත්‍රිවරයා චෝදනා කර සිටියේ.
