මිනුවන්ගොඩ ප්‍රදේශයේදී එකම පවුලේ තිදෙනෙකු ඝාතනය කිරීමේ සිද්ධියට අදාළව සැකකරුවන් 03 දෙනෙකු පොලීසිය විසින් අත්අඩංගුවට ගෙන තිබේ.
පොලිස් මාධ්‍ය කොට්ඨාසය සඳහන් කළේ අදාළ සැකකරුවන් තිදෙනා ගලේවෙල ප්‍රදේශයේදී අත්අඩංගුවට ගත් බවය.
අද (06) උදෑසන මිනුවන්ගොඩ ගමන්ගෙදර ප්‍රදේශයේදී සිදුකළ වෙඩිතැබීමකින් එකම පවුලේ පියා සහ පුතුන් දෙදෙනා ජීවිතක්ෂයට පත්විය.
මෙලෙස මියගොස් ඇත්තේ 51 හැවිරිදි වියේ පියා සහ 23 සහ 24 හැවිරිදි වියේ පසුවූ පුතුන් දෙදෙනාය.
ඔවුන් තිදෙනා මනුෂ්‍ය ඝාතනයකට බන්ධනාගාරගතව සිට මීට මාස කිහිපයකට පෙර ඇප මත මුදාහැර සිටි පුද්ගලයින් තිදෙනෙකු බවට මේ වනවිට අනාවරණය වී තිබේ.
පොලීසිය පවසන්නේ දීර්ඝ කාලයක සිට පැවති ආරවුලක් මත මෙම ඝාතනය සිදුකරන්නට ඇති බවට සැක කරන බවය.
මේ අතර අදාළ ඝාතනය සඳහා ටී 56 වර්ගයේ ගිනි අවියක් භාවිත කරන්නට ඇති බවට පොලීසිය සැකපළකරයි.
ඝාතනය සඳහා සැකකරුවන් මෝටර් රථයකින් සහ යතුරුපැදියකින් සැකකරුවන් පැමිණ ඇති බවත් මූලික විමර්ශනවලදී අනාවරණය වී තිබේ.
වෙඩිතැබීමෙන් මියගොස් ඇති එක් පුද්ගලයෙකුගේ මෘත දේහය මිනුවන්ගොඩ රෝහලේ තැන්පත් කර ඇති අතර අනෙක් දෙදෙනාගේ දේහයන් ඝාතනය සිදුවූ ස්ථානයේ පොලිස් ආරක්ෂාව යටතේ ඇත.
අදාළ ඝාතනය සම්බන්ධයෙන් ගම්පහ ජ්‍යෙෂ්ඨ පොලිස් අධිකාරීවරයාගේ අධීක්ෂණය යටතේ වැඩිදුර විමර්ශන කටයුතු සිදුකරයි.
