ඔමික්‍රොන් ප්‍රභේදය ආසාධනය වීමෙන් වැළකී සිටීමට බූස්ටර් එන්නත ලබාගෙන සිටීම අතිශය වැදගත් වන බවයි ශ්‍රී ජයවර්ධනපුර විශ්ව විද්‍යාලයේ ආචාර්ය චන්දිම ජීවන්දර මහතා අවධාරණය කරන්නේ.
මාත්‍රා 02 කින් ලැබෙන ප්‍රතිශක්තීකරණයට වඩා 05 ගුණයක ප්‍රතිශක්තීකරණයක් බූස්ටර් මාත්‍රාවකින් හිමිවන බව කොළඹ අද පැවති මාධ්‍ය හමුවකදී ඔහු පෙන්වා දුන්නා.
බුස්ටර් මාත්‍රාව ලබාගෙන සිටීමේ තවත් වැදගත් ප්‍රථිඵල 04 ක්ද ඔහු මෙලෙස පැහැදිලි කලා.
ඔමික්‍රෝන් කොවිඩ් ප්‍රභේදය ආසාධිතයින් තවත් 160 දෙනෙකු ශ්‍රී ලංකාවෙන් වාර්තා වී තිබෙනවා.
ශ්‍රී ජයවර්ධනපුර විශ්ව විද්‍යාලය සඳහන් කලේ කොවිඩ් වෛරසය ආසාධිතයන්ගෙන් ලබාගත් ජෛව සාම්පල 182 ක් පරික්ෂා කිරීමේදී මෙම ආසාධිතයන් හඳුනාගත් බවයි.
එම සාම්පලවලින් බහුතරයක් කටුනායක ගුවන්තොටුපොළ වෙත පැමිණි ගුවන් මගීන්ගෙන් ලබාගත් සාම්පල් වනවා.
මෙම සාම්පල පිළිබඳ වාර්තාව අද දිනයේදී සෞඛ්‍ය සේවා අධ්‍යක්ෂ ජනරාල්වරයා වෙත භාරදීමට නියමිත බව ද ශ්‍රී ජයවර්ධනපුර විශ්ව විද්‍යාලය ප්‍රකාශ කලා.
මීට පෙර ද ඔමික්‍රෝන් ප්‍රභේදය ආසාධිතයන් 45 දෙනෙකු ශ්‍රී ලංකාවෙන් වාර්තා වී තිබුණා.
එම සියලූ ආසාධිතයන් හඳුනාගනු ලැබූවේද ශ්‍රී ජයවර්ධනපුර විශ්ව විද්‍යාලයේ වෛද්‍ය පීඨයේදී සිදුකල සාම්පල පරීක්ෂණ හරහායි.
