නෙදර්ලන්ත කණ්ඩායම සමග පැවති තරගය අතරතුරදී මාංශපේශී ආබාධයකට ලක් වූ මහීෂ් තීක්ෂණ ඔස්ටේ‍රලියාව සමග ලබන 28 වනදා පැවැත්වෙන විස්සයි විස්ස තරගයට සහභාගි වීමට සූදානම් බව ශ්‍රී ලංකා ක්‍රිකට් ක්‍රීඩක භානුක රාජපක්ෂ පවසනවා.
ඔහු මේ බව කියා සිටියේ ඊයේ ෂාජා හි දී බංග්ලාදේශය සමග පැවති තරගයෙන් අනතුරුව පැවැත්වූ මාධ්‍ය හමුවේදි අදහස් දක්වමින්.
චරිත් අසලංකගේ විශිෂ්ට පිතිකරණය හේතුවෙන් විස්සයි 20 ලෝක කුසලාන ක්‍රිකට් තරගාවලියේ සුපිරි 12 දෙනාගේ වටයේ ශ්‍රී ලංකාව සහභාගී වූ පළමු තරගයෙන් කඩුළු 5ක ජයක් හිමිකර ගැනීමට සමත් විය.
ඒ බංග්ලාදේශ කණ්ඩායම පරාජයට පත් කරමිනි.
සාජා ක්‍රීඩාංගණයේ කාසියේ වාසිය දිනූ ශ්‍රී ලංකා කණ්ඩායම ප්‍රථමයෙන් පන්දුවට පහරදීම සඳහා බංග්ලාදේශයට ආරාධනා කර තිබුණි.
ඒ අනුව පිටියට පිවිසි බංග්ලාදේශ කණ්ඩායමේ පළමු කඩුල්ල ලෙස ලිටන් ඩාස් දැවි ගියේය.
එම අවස්ථාවේදී පන්දු යවමින් සිටි ලහිරු කුමාර සහ ලීටන් ඩාස් අතර උණුසුම් වචන හුවමාරුවක් සිදුවී තිබුණි.
