මහනුවර ගන්නොරුව ප්‍රදේශය ආශ්‍රිතව මෙන්ම මහනුවර මහවැලි ගඟ සීමාව තුළ ඉදි කර ඇති සියලු අනවසර ඉදි කිරීම් පිළිබඳව තමන්ට වාර්තාවක් ලබා දෙන්නැයි පරිසර අමාත්‍ය මහින්ද අමරවීර මහතා මධ්‍යම පරිසර අධිකාරියට උපදෙස් දුන්නේය.
විශේෂයෙන් ගන්නොරුව මහවැලි ගඟ හරහා ඉදි කර තිබෙන එල්ලෙන පාළම අසළ ඉදි කර ඇති අනවසර ඉදි කිරීම් කිහිපයක් සම්බන්ධයෙන් හා ඊට ආසන්නව මහවැලි ගඟේ අලුතින් නිර්මාණය වී ඇති වැලි කඳු කිහිපයක් සම්බන්ධව මහනුවර දිස්ත්‍රික්කයේ පාර්ලිමේන්තු මන්ත්‍රී මහනුවර දිස්ත්‍රික් සංවර්ධන කමිටුවේ සභාපති වසන්ත යාපා බණ්ඩාර මහතා විසින් ඉදිරිපත් කරන ලද පැමිණිල්ලක් අවධානයට යොමු කර ගනිමින් අමාත්‍යවරයා මෙම උපදෙස් ලබා දුන්නේය.
එකී ප්‍රදේශය තුළ මහවැලි ගඟේ අලුතින් නිර්මාණය වී ඇති වැලි කඳු කිහිපයක් නිසා අධික වර්ෂාවක් ලැබුනු අවස්ථාවක එම ස්ථානයේ දී ගඟ පිටාර ගැලිමට ඉඩ තිබේ. එමනිසා මහවැලි ගඟ දෙපස ඉදි කර ඇති ඉදිකිරීම් රැසකට බරපතල තර්ජනයක් එල්ලවීමට ඉඩ ඇති බව පෙනී ගොස් ඇත.
එමෙන්ම මහවැලි ගඟ දෙපස ඉදිකර ඇති බොහෝ ඉදිකිරීම්වලට පරිසර වාර්තා ලබා ගෙන නොමැති බවත්, එසේ අවිදිමත්ව පරිසර වාර්තා ලබා දුන්නේ නම් ඊට වගකිව යුත්තේ කවුරුන්ද යන්නත් මහනුවර දිස්ත්‍රික් පාර්ලිමේන්තු මන්ත්‍රී මහනුවර දිස්ත්‍රික් සංවර්ධන කමිටුවේ සභාපති වසන්ත යාපා බණ්ඩාර විමසා තිබේ.
මේ නිසා මෙම වැලි කඳු ඉවත් කිරීම සම්බන්ධව වහාම නිලධාරින් පිරිසක් එම ස්ථානයට යවා පරීක්ෂාවට ලක් කරන ලෙස අමාත්‍යවරයා භූ විද්‍යා සමීක්ෂණ හා පතල් කාර්යාංශයට උපදෙස් දුන්නේය.
එමෙන්ම මහනුවර නගර සීමාව තුළ මහවැලි ගඟ ආශ්‍රිතව ඉදි කර ඇති සියලු අනවසර ඉදි කිරීම් සම්බන්ධවත්, ඒවාට පරිසර වාර්තා ලබා දී ඇත්නම් ඒවා විදිමත් පරීක්ෂණයකින් අනතුරුව නිකුත් කර තිබේද යන්න සම්බන්ධවත් වාර්තාවක් වහාම තමන්ට ලබා දෙන ලෙස පරිසර අමාත්‍ය මහින්ද අමරවීර මහතා මධ්‍යම පරිසර අධිකාරියට උපදෙස් දෙනු ලැබීය.
එමෙන්ම ඉදිරි සති දෙක තුළ මධ්‍යම පරිසර අධිකාරිය හා භූ විද්‍යා සමීක්ෂණ හා පතල් කාර්යාංශයේ නිලධාරින් සමග මහනුවරට ගොස් අදාල කාරණා සම්බන්ධව සාකච්ඡා කර විසඳුම් ලබා දීමට පියවර ගැනීමට පරිසර අමාත්‍යවරයා තීරණය කර තිබේ.
