බස්නාහිර පළාතෙහි වයස අවුරුදු 60 ට වැඩි මේ වනතෙක් කොවිඩ් එන්නත ලබානොගත් පුරවැසියන් සඳහා විශේෂ එන්නත්කරණ වැඩසටහනක් අද සිට ආරම්භ කෙරෙනවා.
අදාළ පුද්ගලයන්ගේ තොරතුරු මේ වනවිට කොවිඩ්19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය වෙතින් එක්රැස් කර ඇති බව සඳහන්.
ඔවුන් සඳහා එන්නත්කරණ දිනය, එන්නත්කරණ මධ්‍යස්ථානය සහ එන්නත් ලබාගැනීම සඳහා පැමිණිය යුතු වේලාව සඳහන් කරමින් ජංගම දුරකථන කෙටි පණිවිඩයක් මගින් දැනුවත් කිරීමටයි පියවර ගෙන ඇත්තේ.
ඒ අනුව අද – හෙට සහ අනිද්දා දිනවල කොළඹ දිස්ත්‍රික්කය වෙනුවෙන් නාරාහේන්පිට යුධ හමුදා රෝහලේදීත් / ගම්පහ දිස්ත්‍රික්කය සඳහා හෙට – අනිද්දා සහ ලබන 14 වනදින ගම්පහ දිස්ත්‍රික් මහ රෝහලේදීත් / කලුතර දිස්ත්‍රික්කය සඳහා හෙට දිනයේදී කලුතර දිස්ත්‍රික් මහ රෝහලේදීත් එන්නත්කරණ වැඩපිළිවෙල ක්‍රියාත්මක වනු ඇති.
බස්නාහිර පළාත තුළ වයස අවුරුදු 60 ට වැඩි එන්නත් ලබානොගත් අයෙකු මේ වනතෙක් තමන්ගේ තොරතුරු ලබා දී නොමැතිනම් හෝ එන්නත්කරණ වැඩසටහන් පිළිබඳ වැඩිදුර විස්තර අවශ්‍ය වන්නේනම් 1906 යන දුරකථන අංකය තුලින් ලබාගත හැකියි.
