ගරු සභාපතිතුමා, 2023.01.26
ආණ්ඩුක්‍රම ව්‍යවස්ථා සභාව,
ආණ්ඩුක්‍රම ව්‍යවස්ථා සභාවේ සාමාජිකයින්,
ගරු සභාපතිතුමන් ඇතුලු සාමාජික මහත්මයාණෙනි/මහත්මියනි,
21 වන ආණ්ඩුක්‍රම ව්‍යවස්ථා සංශෝධනය යටතේ ස්වාධීන කොමිෂන් සභා ස්ථාපිත කිරීම.
21 වන ආණ්ඩුක්‍රම ව්‍යවස්ථා සංශෝධනයට අනුව ආණ්ඩුක්‍රම ව්‍යවස්ථා සභාව සඳහා වන සාමාජිකයින්ගේ ඝනපූර්ණය සම්පූර්ණ කරමින් ව්‍යවස්ථාදායක සභාව ස්ථාපනය කිරීමට දායකවීම පිළිබඳව අදාල සියලු පාර්ශවයන්ට අපගේ ස්තූතිය පලකර සිටිමු. ව්‍යවස්ථාදායක සභාව හඳුන්වාදීමේ මුඛ්‍ය පරමාර්ථය වනුයේ රාජ්‍ය සේවය, අධිකරණ, මැතිවරණ සහ පොලීසිය වැනි ආයතන වඩා ස්වාධීන ආයතන බවට පත් කීරීමයි.
එකී අරමුණ ඉටුකර ගැනීමට නම් ස්වාධීන කොමිෂන් සභා සඳහා පත්කරනු ලබන පුද්ගලයින් සමාජ පිළිගැනීමක් මෙන්ම දේශපාලන මධ්‍යස්ථ භාවයකින් යුතු තමන්ට අදාල වන ක්ෂේත්‍රය පිළිබඳව ප්‍රාමාණික දැනුමක් සහිත පුද්ගලයන් විය යුතු බවට කිසිඳු විවාදයක් නැත. අප එලෙස පවසන්නේ ස්වාධීන කොමිෂන් සභාවලට පත්කරනු ලබන පුද්ගලයින් විසින් ගනු ලබන තීන්දු තීරණ රටේ අනාගත පැවැත්ම කෙරෙහි තීරණාත්මක බලපෑමක් සිදු කරනු ලබන බැවිනි. එබැවින් ස්වාධීන කොමිෂන් සභා ස්ථාපිත කිරීමේ දී මතු දැක්වෙන කරුණු පිළිබඳව සුවිශේෂී අවධානය යොමු කරන මෙන් කාරුණිකව ඉල්ලමි.
1. කොමිෂන් සභා වල සාමාජිකයින් තෝරාගැනීමට අදාලව විනිවිදභාවය සහිත නිසි ක්‍රමවේදයක් සැකසීම.
2. කොමිෂන් සභා වලට සාමාජිකයින් පත් කිරීමට පෙර එකී කොමිෂන් සභා වල ක්‍රියාකාරිත්වයට අදාල ක්‍රියාපටිපාටීන් සකස් කිරීම.
3. කොමිෂන් සභා වල සාමාජිකයින් යනු සමාජයේ ඉහල ගෞරවයක් හිමිවන තනතුරක් බැවින් එවැනි මට්ටමේ පිරිස් අයදුම් කිරීමේ ඉඩකඩ ඉතා අවම වන බැවින් ඒ සඳහා අයදුම්පත වෙනුවට නාමයෝජනා කිරීමේ ක්‍රමවේදයක් සකසන ලෙස.
4. තෝරා ගනු ලබන පුද්ගලයින්ගේ දැනුම දේශපාලනික මධ්‍යස්ථභාවය සමාජ පිළිගැනීම මෙන්ම සමාජ පෞර්ෂය කෙරෙහිද අවධානය යොමු කිරීම.
5. කොමිෂන් සභා සඳහා සාමාජිකයින් නිර්දේශ කිරීමේදී ජනවාර්ගික නියෝජනය මෙන්ම කාන්තා නියෝජනය පිළිබඳවද සැලකිලිමත් වීම.
මේ වන විට පළාත් පාලන ආයතන ඡන්ද විමසීම සඳහා දින නියම කර එකී ක්‍රියාවලියේ සැලකිය යුතු දුරක් ගමන් කර ඇති හෙයින් නව කොමිසමක් පත් කිරීම හෝ පවතින කොමිසමේ සාමාජිකයින් වෙනස් කිරීම මගින් මැතිවරණ කෙරෙහි මහජන විශ්වාසය බිඳවැටිය හැකි අතර සමාජය තුළ සැක සංකා නිර්මාණය වීම නොවැළැක්විය හැකි වනු ඇත. එමනිසා ඡන්ද විමසීම අවසන් වන තෙක් වත්මන් කොමිසමට සිය කටයුතු බාධාවකින් තොරව සිදු කිරීමට ඉඩ ප්‍රස්ථාව සැලසීම ඔබතුමා ඇතුලු ආණ්ඩුක්‍රම ව්‍යවස්ථා සභාවේ සාමාජිකයින් කටයුතු කරනු ඇතැයි අප විශ්වාස කරමු.
උක්ත කරුණු පිළිබඳව ඔබතුමා ඇතුලු ආණ්ඩුක්‍රම ව්‍යවස්ථා සභාවේ සාමාජිකයින්ගේ සුවිශේෂී අවධානය යොමු කරන මෙන් ඉල්ලා සිටින අතර ආණ්ඩුක්‍රම ව්‍යවස්ථා සභාව ගනු ලබන තීන්දු තීරණ මගින් රටේ ප්‍රජාතන්ත්‍රවාදයත් අනාගත දිශානතියත් තීන්දු වන බව අවධාරණය කරනු කැමැත්තෙමු.
මෙයට,
විශ්වාසී,
රෝහණ හෙට්ටිආරච්චි,
කැඳවුම්කරු,
මාර්තු 12 ව්‍යාපාරය
පිටපත – උනන්දුවක් දක්වන සෙසු ආයතන
