හෙට (01) සිට පළාත් අතර පොදු ප්‍රවාහන සේවා යළි ආරම්භ කරන බව ප්‍රවාහන රාජ්‍ය අමාත්‍ය දිලුම් අමුණුගම මහතා පවසනවා.
ඒ අනුව බස්රථ සේවා සහ දුම්රිය සේවා සියයට 75කින් පමණ හෙට සිට සක්‍රිය කරන බවයි මහනුවරදී අද මාධ්‍යයට අදහස් දක්වමින් රාජ්‍ය අමාත්‍යවරයා කියා සිටියේ.
රැකියා සදහා දෛනිකව යන එන මගීන් වෙනුවෙන් බස් රථ සහ දුම්රිය යොදවා ඇති අතර දවසේ අතරමැදි කාලයේ ප්‍රවාහන සේවාවන් සාමාන්‍ය පරිදි ධාවනය නොවන බවද දිලුම් අමුණුගම මහතා කියා සිටියා.
පොදු ප්‍රවාහන සේවා භාවිත කිරීමේදී බරපතල අවදානමක් ඇති බැවින් කොවිඩ් වසංගතයෙන් ආරක්ෂා වීම සදහා අනුගමනය කළ යුතු නිවැරදි සෞඛ්‍ය උපදෙස් එලෙසම අනුගමනය කරන ලෙස දිලුම් අමුණුගම මහතා මගී ජනතාවගෙන් ඉල්ලීමක් කළා.
පොදු ප්‍රවාහන සේවා පවත්වාගෙනයාමේදී අනුගමනයකළ යුතු උපදෙස් කඩකරන බස්රථවලට එරෙහිව අවශ්‍ය නීතිමය ක්‍රියාමාර්ග ගන්නා ලෙස පොලිසියට දැනුම් දී ඇති බවද ඔහු සදහන් කළා.
