පළාත් අතර පොදු ප්‍රවාහන සේවා අද (01) සිට යළි ආරම්භ කෙරෙනවා.
ප්‍රවාහන රාජ්‍ය අමාත්‍ය දිලුම් අමුණුගම මහතා සදහන් කළේ බස්රථ සේවා සහ දුම්රිය සේවා සියයට 75 කින් පමණ හෙට සිට සක්‍රිය කරන බවයි.
රැකියා සදහා දෛනිකව යන එන මගීන් වෙනුවෙන් අද සිට බස් රථ සහ දුම්රිය යොදවා ඇති අතර දවසේ අතරමැදි කාලයේ ප්‍රවාහන සේවා සාමාන්‍ය පරිදි ධාවනය නොවන බවයි ඔහු කියා සිටියේ.
පොදු ප්‍රවාහන සේවා භාවිත කිරීමේදී බරපතල අවදානමක් ඇති බැවින් කොවිඩ් වසංගතයෙන් ආරක්ෂා වීම සදහා අනුගමනය කළ යුතු නිවැරදි සෞඛ්‍ය උපදෙස් එලෙසම අනුගමනය කරන ලෙස දිලුම් අමුණුගම මහතා මගී ජනතාවගෙන් ඉල්ලීමක් කළා.
පොදු ප්‍රවාහන සේවා පවත්වාගෙනයාමේදී අනුගමනයකළ යුතු උපදෙස් කඩකරන බස්රථවලට එරෙහිව අවශ්‍ය නීතිමය ක්‍රියාමාර්ග ගන්නා ලෙස පොලිසියට දැනුම් දී ඇති බවද ඔහු සදහන් කළා.
මේ අතර කොවිඩ් අවදානම හමුවේ අත්හිටවූ අන්තර් පළාත් බස් රථ ප්‍රවාහන කටයුතු අද සිට නැවතත් ආරම්භ කරන බව ලංකා ගමනාගමන මණ්ඩලය පවසනවා.
ලංකා ගමනාගමන මණ්ඩලයේ නියෝජ්‍ය සාමාන්‍යාධිකාරී – ධාවන පණ්ඩුක ස්වර්ණහංස මහතා කියා සිටියේ අද දිනයේදී ධාවනය වීමට නියමිත බස්රථ සංඛ්‍යාව ඒ සඳහා යොදවන බවයි.
හෙට සිට නියමිත කාලසටහන අනුව ලංකා ගමනාගමන මණ්ඩලයේ සම්පූර්ණ බස් රථ සංඛ්‍යාව ධාවනයේ යෙදවීමට නියමිත බවද පණ්ඩුක ස්වර්ණහංස මහතා කියා සිටියා.
මේ අතර අත්‍යවශ්‍ය රාජකාරි සදහා පැමිණෙන පුද්ගලයින් වෙනුවෙන් හෙට සිට අන්තර් පළාත් ප්‍රවාහනය සදහා දුම්රිය කිහිපයක් යෙදවීමට නියමිත බව දුම්රිය සාමාන්‍යාකාරි ධම්මික ජයසුන්දර මහතා සදහන් කළා.
