ශ්‍රේෂ්ඨාධිකරණ නියෝග උල්ලංඝනය කරමින් රජයේ පාසල්වල පළමු වසර පංතියක සිටිය යුතු සිසුන් සංඛ්‍යාව 40 දක්වා වැඩිකිරීමට අධ්‍යාපන බලධාරීන් ගෙන ඇති තීරණය බලරහිත කරන ලෙස ඉල්ලා අභියාචනාධිකරණය හමුවේ රිට් පෙත්සමක් ගොණු කර තිබෙනවා.
ලංකා ගුරු සංගමය සහ එහි ප්‍රධාන ලේකම් ජෝසෆ් ස්ටාලින් මහතා විසිනුයි එම පෙත්සම ඉදිරිපත් කර ඇත්තේ.
එහි වගඋත්තරකරුවන් ලෙස අධ්‍යාපන අමාත්‍යාංශයේ ලේකම්වරයා, ජාතික පාසල් අධ්‍යක්ෂවරයා සහ අධ්‍යාපන අමාත්‍ය මහාචාර්ය ජී. එල්. පීරිස් යන පිරිස නම්කර තිබෙනවා.
පෙත්සම්කරුවන් කියා සිටින්නේ 2011 වසරේ ශ්‍රේෂ්ඨාධිකරණය විසින් ප්‍රකාශයට පත් කළ නියෝගයකට අනුව ජාතික පාසල්වල පන්තියක සිටියයුතු උපරිම ළමුන් සංඛ්‍යාව 35 කට සීමාකර ඇති බවයි.
එහෙත් අධ්‍යාපන අමාත්‍යංශයේ ලේකම්වරයා විසින් පසුගිය මැයි මස 28 වනදා නිකුත්කළ චක්‍රලේඛයක් මගින් පළමු වසර සඳහා රජයේ පාසල්වල පන්තියක සිටිය යුතු ළමුන් සංඛ්‍යාව 40 දක්වා වැඩි කිරීමට තීරණය කර ඇතැයි චෝදනා කරන පෙත්සම්කරු එය ශ්‍රේෂ්ඨාධිකරණ නියෝගයට මෙන්ම අධ්‍යාපන සේවා පනත් විධිවිධානවලට පටහැනි බවද පෙන්වා දී තිබෙනවා.
ඒ අනුව පළමු වසර පන්තියක සිටියයුතු ළමුන් සංඛ්‍යාව 40 දක්වා වැඩිකිරීමට අධ්‍යාපන අමාත්‍යාංශයේ ලේකම්වරයා නිකුත්කර ඇති චක්‍රලේඛය බලරහිත කිරීමේ ආඥාවක් නිකුත්කරන ලෙස මෙම පෙත්සමෙන් ඉල්ලා ඇත්තේ.
