ඔලිම්පික් ක්‍රීඩා උළෙලක පළමු වරට මළල ක්‍රීඩා ඉසව්වක රන් පදක්කමක් ක්‍රීඩකයින් දෙදෙනෙකු විසින් බෙදාගනු ලැබුවා.
ඒ, ටෝකියෝ ඔලිම්පික් ක්‍රීඩා උළෙලේ ඊයේ පැවති පිරිමි උස පැනීමේ ඉසව්වේදීයි.
එහිදී කටාර් රාජ්‍ය නියෝජනය කළ මුටාස් එසා සහ ඉතාලිය නියෝජනය කළ ජියන් මාර්කෝ මෙලෙස එම රන් පදක්කම බෙදාගනු ලැබුවා.
ඔවුන් දෙදෙනාම අවසන් තරගයේදී මීටර් දෙකයි දශම 1 යි නවයේ සිට මීටර් දෙකයි දශම 3 යි 7 දක්වා උසක් වාර්තා කලා.
කෙසේවෙතත් ඔවුන් දෙදෙනාට පසුව ලබාදුන් මීටර් දෙකයි දශම 3 යි 9 ක උස තරණය කිරීම අපහසු වුණා.
අනතුරුව රන් පදක්කම දිනා ගන්නා ක්‍රීඩකයා තේරීම සදහා තවත් තවත් උසක් තරණය කරන්නේ දැයි තරග විනිසුරුවන් එම ක්‍රීඩකයින් දෙදෙනාගෙන් විමසා තිබෙනවා.
එහිදී එම ක්‍රීඩකයින් දෙපළ තරග විනිසුරුවන්ගෙන් විමසා සිටියේ මෙම රන් පදක්කම බෙදාගැනීමට නොහැකි ද යන්නයි.
අනතුරුව තරග විනිසුරුවන් ඊට එකගතාව පළ කළ අතර ඒ අනුව කටාර් ක්‍රීඩකයා සහ ඉතාලි ක්‍රීඩකයා අතරේ පිරිමි උස පැනීමේ ඉසව්වේ රන් පදක්කම බෙදී ගියා.
