2016, 2017 සහ 2018 වසරවලදී ළමුන් සම්බන්ධයෙන් පරිවාස හා ළමාරක්ෂක සේවා දෙපාර්තමේන්තුව වෙත වාර්තා වූ පැමිණිලි අතරින් 485 ක් සඳහා කිසිදු ක්‍රියාමාර්ගයක් ගෙන නොමැති බව හෙළිවී තිබෙනවා.
පැමිණිලි සඳහා දුන් විසඳුම් වල ප්‍රගතිය විමසීමක් හෝ පසුවිපරම් කිරීමක් හෝ එම දෙපාර්තමේන්තුව විසින් සිදු කර නොමැති බවද රජයේ ගිණුම් පිළිබඳ කාරක සභාවේදී හෙළිවී තිබෙනවා.
පරිවාස හා ළමාරක්ෂක සේවා දෙපාර්තමේන්තුව විසින් 2016 වර්ෂයේ දී ළමුන් සම්බන්ධයෙන් පර්යේෂණ 03 ක් සිදුකිරීම සඳහා රුපියල් ලක්ෂ 50 කට ආසන්න මුදලක් වැය කර තිබූ නමුත් එම පර්යේෂණ වාර්තාවලින් ලබාගත් නිර්දේශ හා නිගමන ක්‍රියාත්මක කිරීමට ප්‍රමාණවත් පරිදි වැඩසටහන් ව්‍යාපෘති සැලසුම් කර ක්‍රියාත්මක නොවීම පිළිබඳ මෙහිදී කාරක සභාවේ අවධානයට යොමුවුණා.
ළමයින් සම්බන්ධයෙන් සිදුවන සයිබර් අපරාධ සඳහා නියාමනයක් නොමැති හෙයින් නියාමන කිරීමට වහා ක්‍රියාත්මක කිරීමේ වැදගත්කම පිළිබඳවත් මෙහිදී සාකච්ඡාවට ලක්වී තිබෙනවා.
එමෙන්ම ඔන්ලයින් අධ්‍යාපනය ලැබීමේදී අන්තර්ජාලය භාවිතයේදී සිදුවන වැරදි සම්බන්ධයෙන් ද අවධානය යොමුකර ඒ සඳහා ද පිළියම් යෙදීමටද කමිටුවේ අවධානය යොමු කර තිබෙනවා.
