ඇතැම් සමාජ මාධ්‍ය ජාලා වල සංසරණය වන පරිදි මඩකළපුවට ඔබ්බෙන් වූ මුහුදු සීමාවේ නීති විරෝධි වැලි කැණිමක් සිදු වූ බවට වන වාර්තා සම්පුර්ණයෙන් අසත්‍ය බව නාවික හමුදාව අවධාරණය කරනවා.
මෙම අසත්‍ය වාර්තා සඳහා මුල් වූ ටග් යාත්‍රාව සහ බත්තල එක්සත් ආරාබි එමීර් රාජ්‍යයේ සිට බංගලාදේශයේ චිතගොං වරාය දක්වා හුණුගල් ප්‍රවාහනය කරමින් තිබු අතර, අවශ්‍ය ඉන්ධන ඇතුළු අනෙකුත් සැපයුම් අවශ්‍යතා සපුරා ගැනීම සඳහා ත්‍රිකුණාමලය වරාය වෙත පැමිණීමටයි නියමිත වූයේ.
එහෙත් මුහුදේ පැවැති රළු ස්වභාවය මත සැලසුම් කළ දිනට ඉන්ධන ඇතුළු සැපයුම් අවශ්‍යතා සපුරා ගැනීම සඳහා එම ටග් යාත්‍රාවට ත්‍රිකුණාමලය වරාය වෙත පැමිණීමට නොහැකි වීම මත පැනනැගුණු ඉන්ධන හිගතාවය හේතුවෙන් බත්තල රැගත් එම ටග් යාත්‍රාව මඩකළපුවට ආසන්නව පසුගිය දෙසැම්බර් මස 15 වන දින ආරක්‍ෂිතව නැංගුරම් ලා තිබෙනවා.
ඒ අනුව, මුර සංචාරයේ යෙදී සිටි ශ්‍රී ලංකා නාවික හමුදා නෞකා විසින් මෙම ටග් යාත්‍රාව සහ බත්තල නිරීක්‍ෂනය කර නැගෙනහිර නාවික විධානය ඔස්සේ නාවික හමුදා මුලස්ථානය දැනුවත් කිරිමටයි කටයුතු කර ඇත්තේ.
මෙම ටග් යාත්‍රාව සිංගප්පුරු සමාගමකට අයත් වන අතර ත්‍රිකුණාමලය වරාය වෙත ලගා වීමට අවශ්‍ය ඉන්ධන, දේශීය සැපයුම් කරුවෙකු මාර්ගයෙන් ලබා ගන්නා තුරු දින කිහිපයක් එම ස්ථානයේ ටග් යාත්‍රාව නැංගුරම්ලා තිබී ඇතැයි සඳහන්.
ටග් යාත්‍රාව සහ බත්තල ඊයේ දින ත්‍රිකුණාමලය වරාය වෙත ලගාවී ඇතැයි නාවික හමුදාව සඳහන් කලා.
මේ වන එම ටග් යාත්‍රාව සහ බත්තල ත්‍රිකුණාමල පිටත වරායේ නැංගුරම්ලා තිබෙන අතර, ඉන්ධන ඇතුළු සැපයුම් අවශ්‍යතා සම්පුර්ණ කර ගැනීමෙන් පසු අද සවස හෝ හෙට පෙරවරුවේ නැවතත් ගමනාන්තය වන බංගලාදේශය බලා යාත්‍රා කිරීමට නියමිතයි.
මෙම ටග් යාත්‍රාව විශාල ප්‍රමාණයේ බත්තල් ඇදගෙන යාම සඳහා භාවිත කරනු ලබන සාමාන්‍ය ප්‍රමාණයේ ටග් යාත්‍රාවක් වන අතර, මුහුදු පතුලේ කිසිදු කැණිමක් හෝ හැරීමක් සිදු කිරිම සඳහා ශඛ්‍යතාවයක් නොමැති යාත්‍රාවක් බව නාවික හමුදාව අවධාරණය කරනවා.
