පසුගිය යහපාලන රජයේ සමයේ සිදුවූ බව කියන දේශපාලන පළිගැනීම් සම්බන්ධයෙන් සොයාබැලීමට පත්කළ ජනාධිපති කොමිසම විසින් රජයේ අධි නීතිඥ ජනක බණ්ඩාර මහතා පිළිබඳ දී ඇති අවසන් නිර්දේශ පිළිබද ඉදිරි පියවර ගැනීම වළක්වමින් අභියාචනාධිකරණය විසින් තහනම් නියෝගයක් නිකුත් කර තිබෙනවා.
එම අවසන් නිර්දේශ මගින් ජනක බණ්ඩාර මහතා වගඋත්තරකරුවෙකු කල යුතු බවට ජනාධිපති කොමිෂන් සභාව නිර්දේශ කර තිබූණා.
එම නිර්දේශවලට එරෙහිව ජනක බණ්ඩාර මහතා විසින් අභියාචනාධිකරණයට ගොනු කර තිබූ පෙත්සමක් විභාග කළ නිශ්ශංක බන්දුල කරුණාරත්න, දේවිකා අබේරත්න සහ බී එම් සමරකෝන් යන ත්‍රිපුද්ගල අභියාචනාධිකරණ විනිසුරු මඩුල්ලයි එම නියෝගය ලබා දුන්නේ.
එසේම ජනක බණ්ඩාර මහතා ඉදිරිපත් කළ පෙත්සම විභාගයට ගැනීමට ද අවසර ලබා දී තිබෙනවා.
එම පෙත්සමේ වගඋත්තරකරුවන් ලෙස නම්කර සිටින දේශපාලන පළිගැනීම් සම්බන්ධයෙන් සොයාබැලීමට පත්කළ ජනාධිපති කොමිසමේ සභාපතිවරයා ලෙස කටයුතු කළ විශ්‍රාමික ශ්‍රේෂ්ඨාධිකරණ විනිසුරු උපාලි අබේරත්න / එහි අනෙක් කොමසාරිස්වරුන් දෙදෙනාටත් / එවකට කොමිෂන් සභාවේ ලේකම්වරිය සහ නීතිපතිවරයාට සැප්තැම්බර් 29 වනදා අධිකරණය හමුවේ පෙනී සිටින ලෙස නොතීසි නිකුත් කර තිබෙනවා.
ඊට අමතරව මෙම ජනාධිපති කොමිෂන් සභාව විසින් ලබා දුන් අවසන් වාර්තා අනුව 2021 ජනවාරි 18 වනදා කැබිනට් මණ්ඩලය ලබා දුන් තීරණය අනුව ඉදිරි පියවර ගැනීම වළක්වමින් තහනම් නියෝගයක්ද නිකුත් කර තිබෙනවා.
