දිස්ත්‍රික් 11 කට පණවා ඇති නාය යෑමේ අනතුරු ඇගවීම අද රාත්‍රී 09 දක්වා දීර්ඝ කර තිබෙනවා.
කොළඹ / ගම්පහ / බදුල්ල / ගාල්ල / කලූතර / කුරුණෑගල / මාතලේ / නුවරඑළිය / මහනුවර / කෑගල්ල සහ රත්නපුර දිස්ත්‍රික් සඳහායි මෙම නායයෑමේ අනතුරු ඇගවීම් නිවේදනය බලපැවැත්වෙන්නේ.
මේ අතර ගිණිකොණ දිග බෙංගාල බොක්ක මුහුදු ප්‍රදේශයේ අඩු පීඩන කලාපය තවදුරටත් ස්ථානගතව පවතිනවා.
එම පද්ධතිය ඉදිරි පැය 36 තුළ පීඩන අවපාතයක් දක්වා තවදුරටත් වර්ධනය වෙමින් බස්නාහිරට බරව වයඹ දෙසට ගමන් කර ශ්‍රී ලංකාවේ උතුරු වෙරළ ආසන්නයෙන් උතුරු තමිල්නාඩු වෙරළට ළගාවනු ඇතැයි අපේක්ෂා කෙරෙනවා.
මෙහි බලපෑම හමුවේ දිවයිනේ බොහෝ ප්‍රදේශවල අද දිනයේත් විටින් විට වැසි හෝ ගිගුරුම් සහිත වැසි ඇති විය හැකි බව කාළගුණ විද්‍යා දෙපාර්තමේන්තුව පවසනවා.
බස්නාහිර – උතුර – වයඹ සහ උතුරු මැද පළාත්වල ඇතැම් ස්ථානවලට මිලිමීටර 150 ට වැඩි ඉතා තද වැසි ඇති විය හැකි බවයි කාළගුණ නිවේදනයේ දැක්වෙන්නේ.
සබරගමුව සහ මධ්‍යම පළාත්වලත් ත්‍රිකුණාමලය දිස්ත්‍රික්කයේත් ඇතැම් ස්ථානවලට මිලිමීටර 100 පමණ තද වැසි ඇති විය හැකියි.
මේ අතර නැවත දැනුම් දෙන තුරු නිරිත දිග බෙංගාල බොක්ක ප්‍රදේශයේ හා දිවයින වටා ගැඹුරු හා නොගැඹුරු මුහුදු ප්‍රදේශ වල ධීවර කටයුතුවල යෙදිමෙන් වළකින්නැයි කාළගුණ විද්‍යා දෙපාර්තමේන්තුව ජනතාවට දැනුම් දෙනවා.
දැනට මෙම කළාපයේ ධීවර කටයුතුවල යෙදි සිටින ප්‍රජාව වෙතොත් වහාම ගොඩබිමට හෝ ආරක්ෂිත ස්ථානයක් කරා පැමිණෙන ලෙසයි කාළගුණ විද්‍යා දෙපාර්තමේන්තුව දැනුම් දෙන්නේ.
අධික වර්ෂාවෙන් දිස්ත්‍රික්ක 17 ක පුද්ගලයින් 28 දහසකට වැඩි පිරිසක් පීඩාවට පත්ව සිටින අතර ආපදා මරණ සංඛ්‍යාව 15 දක්වා ඉහළ ගොස් තිබෙනවා.
අයහපත් කාලගුණ තත්ත්වය හේතුවෙන් දුම්රිය ධාවනයට තවදුරටත් බාධා එල්ල වී ඇති අතර ප්‍රධාන මාර්ගයේ දුම්රිය ධාවන කටයුතු කොළඹ කොටුව සිට රඹුක්කන දක්වා පමණක් සීමා කර තිබෙනවා.
පුත්තලම් මාර්ගයේ දුම්රිය ධාවන කටයුතු කොළඹ කොටුව සිට බංගදෙණිය දක්වා පමණක් සීමා කිරීමටයි දුම්රිය දෙපාර්තමේන්තුව පියවර ගෙන ඇත්තේ.
අයහපත් කාලගුණ තත්වයෙන් දුම්රිය මාර්ගයට හානිවීම නිසා උඩරට මාර්ගයේ කොළඹ කොටුව – මහනුවර දුම්රිය ගමන් වාර 08 ක් නැවත දැනුම් දෙනතුරු අවලංගු කර තිබෙනවා.
