මාතර දිස්ත්‍රික්කයේ පිටබැද්දර ප්‍රාදේශීය ලේකම් කොට්ඨාශයට ඇම්බර් වර්ණයෙන් යුතු අදියර 2 යටතේ වන අවදානම් නිවේදනයක් නිකුත් කර තිබෙනවා.
ඒ අනුව, අවසන් පැය 24 තුළ එම ප්‍රදේශයේ වර්ෂාපතනය මිලි මීටර් 100 ඉක්මවා ඇති බැවින් වර්ෂාව තවදුරටත් පවතී නම් නාය යෑම්, බෑවුම් කඩා වැටීම්, ගල් පෙරළීම්, පොළොව ගිලා බැසීම් සහ පස් කණ්ඩි කඩා වැටීමේ අවධානම පිළිබඳ අවධානයෙන් සිට අවශ්‍ය වුවහොත් ආරක්ෂිත ස්ථානයකට යාමට සූදානම් වන ලෙසයි එම නිවේදනයේ දැක්වෙන්නේ.
මේ අතර දිස්ත්‍රික්ක 5කට අයත් තවත් ප්‍රාදේශීය ලේකම් කොට්ඨාස 14කට ද නායයාම් පිළිබඳ අදියර 01 යටතේ වන විමසිලිමත් වන සඳහන් කහ නිවේදන නිකුත් කර තිබෙනවා.
ඒ අනුව ගාල්ල දිස්ත්‍රික්කයේ නාගොඩ, නෙළුව, බද්දේගම, යක්කලමුල්ල සහ ඇල්පිටිය මෙන්ම හම්බන්තොට දිස්ත්‍රික්කයේ වලස්මුල්ල හා මාතර දිස්ත්‍රික්කයේ අතුරලිය, පස්ගොඩ, මුලටියන, කොටපොල සහ අකුරැස්ස යන ප්‍රාදේශීය ලේකම් කොට්ඨාශ සඳහා විමසිලිමත් වන ලෙස නායයාමේ අනතුරු ඇගවීමේ නිවේදන නිකුත් කර තිබෙනවා.
ඊට අමතරව කළුතර දිස්ත්‍රික්කයේ වළල්ලාවිට සහ පාලින්ද නුවර, රත්නපුර දිස්ත්‍රික්කයේ කිරිඇල්ල සහ ඇහැලියගොඩ යන ප්‍රාදේශීය ලේකම් කොට්ඨාශ සඳහා ද මෙම නායයාම් අනතුරු ඇගවීමේ නිවේදනය බලපැවැත්වෙන බවයි ජාතික ගොඩනැගිලි පරියේෂණ සංවිානය පැවසුවේ.
නිල්වලා සහ ගිං යන ගංඟා ද්‍රෝණිවල ඉහළ සහ මධ්‍යම දාරා ප්‍රදේශවලට ඇදහැලෙන වර්ෂාපතනය හේතුවෙන් පහත්බිම්වල වෙසෙන ජනතාව වෙත වාරිමාර්ග දෙපාර්තමේන්තුව විසින් ගංවතුර පිළිබඳ අනතුරු ඇගවීමේ නිවේදන නිකුත් කර තිබෙනවා.
ඒ අනුව කොටපොල, පිටබැද්දර, අකුරැස්ස, අතුරලිය, මාලිම්බඩ, තිහගොඩ, මාතර සහ දෙවිනුවර යන ප්‍රාදේශීය ලේකම් කොට්ඨාශවල නිල්වලා ගඟ අවට පහත්බිම් වල වෙසෙන ජනතාව ඒ පිළිබඳ අවදානයෙන් පසුවන ලෙසයි වාරිමාර්ග දෙපාර්තමේන්තුව සඳහන් කළේ.
කෙසේවෙතත් මේවනවිට නිල්වලා ගඟ අවට පහත්බිම් රැසක් ජලයෙන් යටවී ඇත.
