දියේ ගිලීමෙන් සිදුවන අනතුරුවලින් සෑම වසරකම ශ්‍රී ලාංකිකයන් 800 දෙනෙකු මියයන බව අනාවරණ වී තිබෙනවා.
නොදැනුවත්ව සිදුවන අනතුරුවලින් මියයන සාධක අතරින් දෙවන සාධකයද එය වන බවයි සෞඛ්‍ය අමාත්‍යංශයේ බෝ නොවන රෝග ඒකකය නිකුත් කළ නිවේදනයක දැක්වෙන්නේ.
හෙට දිනට යෙදෙන ලෝක දියේ ගිලීම් වැළැක්වීමේ දිනය වෙනුවෙන් එම නිවේදනය නිකුත් කර තිබෙනවා.
දියේ ගිලීමෙන් වසරකට ලොවපුරා වාර්තාවන මරණ සංඛ්‍යාව දෙලක්ෂ විසිදහසකට අධිකයි. ඉන් තුනෙන් එකක් වාර්තාවන්නේ දකුණු ආසියානු රටවලින්.
දියේ ගිලීමෙන් ලොවපුරා සිදුවන මරණ අතරින් වැඩි සංඛ්‍යාවක් වයස අවුරුද්දත් අවුරුදු 4ත් අතර ළමුන් වීම විශේෂත්වයක්.
වයස අවුරුද්දත් අවුරුදු 9ත් අතර ළමුන්ගේ මරණ සදහා ප්‍රධානතම හේතුව දියේ ගිලීම බව මේවනවිට හදුනාගෙන තිබෙනවා.
නුසුදුසු මිනිස් හැසිරීම දියේ ගිලීම් සදහා බලපා ඇති ප්‍රධාන හේතුව ලෙසයි හදුනාගෙන ඇත්තේ.
දියේ ගිලූනු තැනැත්තෙකු බේරා ගැනුනද දියේ ගිලී සිටි කාලය තුල මොළයට ඔක්සිජන් ප්‍රමාණය අඩුවීම හෝ නොමැතිවීම ඔවුන්ගේ මතකය සම්බන්ධ ගැටලූ ඇතුලූ ඉගෙනීමේ දුර්වලතා මෙන්ම දිගුකාලීන යම් ආබාධවලට හේතු විය හැකි බවයි සෞඛ්‍ය අමාත්‍යංශයේ බෝ නොවන රෝග ඒකකය පෙන්වා දෙන්නේ.
කොවිඩ් 19 වසංගතය හේතුවෙන් පනවාතිබූ සංචරණ සීමා හේතුවෙන් පසුගිය කාලය තුල දියේ ගිලීමෙන් සිදුවන අනතුරුවල යම් අඩුවක් පෙන්නුම් කර තිබෙනවා.
කෙසේ වෙතත් සංචරණ සීමා යළි ලිහිල් කර තිබීම හමුවේ මිනිස් ක්‍රියාකරකම් හේතුවෙන් ඉදිරි කාලය තුල දියේ ගිලීමෙන් සිදුවන අනතුරු ඉහළ යා හැකි බැවින් සෑම අවස්ථාවකම අවධානයෙන් කටයුතු කරන ලෙසයි සෞඛ්‍ය අමාත්‍යංශය ජනතාවට දැනුම් දෙන්නේ.
