මිශ්‍ර මැතිවරණ ක්‍රමයක අවශ්‍යතාව ශ්‍රී ලංකා නිදහස් පක්ෂය, මැතිවරණ නීති රීති ප්‍රතිසංස්කරණ පාර්ලිමේන්තු විශේෂ කාරක සභාවේදී’අවධාරණය කර තිබෙනවා.
ඒ ශ්‍රී ලංකා නිදහස් පක්ෂය, එක්සත් ජනතා නිදහස් සංධානය සහ පොදුජන එක්සත් පෙරමුණ සිය යෝජනා ලිඛිතව භාර දුන් අවස්ථාවේදීයි.
විධායක ජනාධිපති ක්‍රමය පවත්වා ගෙන යාම අත්‍යාවශ්‍ය බවත්, ජනාධිපතිධූරයට ද්විත්ව පුරවැසියන් පත්වීම වළක්වාලීමට නිසි ක්‍රමවේද සැකසිය යුතු බවත් නිදහස් පක්ෂ මහ ලේකම් රාජ්‍ය අමාත්‍ය දයාසිරි ජයසේකර මහතා මෙහිදී පෙන්වා දී තිබෙනවා.
ජනාධිපතිවරණය සහ මහමැතිවරණය එකම දිනයකදීත් / පළාත් සභා මැතිවරණය සහ පළාත් පාලන මැතිවරණය එකම දිනයකදීත් පැවැත්වීමට ඇති හැකියාව පිළිබඳ සොයා බැලිය යුතු බවද රාජ්‍ය අමාත්‍යවරයා සඳහන් කලා.
දේශපාලන පක්ෂ සන්ධාන ගත වීමේදී ඊට අදාළ අවබෝධතා ගිවිසුම් ඇතුළු ලේඛන මැතිවරණ කොමිෂන් සභාවට ලබා දීමේ ක්‍රමවේදයක් සැකසිය යුතු බව එක්සත් ජනතා නිදහස් සංධානය වෙනුවෙන් අදහස් දැක් වු එහි මහලේකම් අමාත්‍ය මහින්ද අමරවීර මහතා කියාසිටියා.
කාරක සභාවේ මීලග රැස්වීම අගෝස්තු 18 වැනිදා පැවැත්වීමට නියමිතයි.
