ජාත්‍යන්තර කාන්තා දිනය යෙදුණු මෙම සතියේදී කාන්තාවගේ අයිතිවාසිකම් ආරක්ෂා කිරීම පාර්ලිමේන්තු සභාවෙන් ආරම්භ කල යුතු බව සමගි ජනබලවේගය පවසනවා.
පාර්ලිමේන්තුවේ කාන්තා මන්ත්‍රීවරියන්ට දිගින් දිගටම එල්ල වන හිරිහැර සම්බන්ධයෙන් නිසි පියවරක් මේ වනතෙක් නොගැනීම කණගාටුවට කරුණක් බවයි පාර්ලිමේන්තු මන්ත්‍රිනී රෝහිණී කවිරත්න මහත්මිය විවාදයේදී අදහස් දක්වමින් කියා සිටියේ.
මේ අතර ගැබිණි මව්වරුන් සිය දරු ප්‍රසූතිය සිදුකරන අවස්ථාව දැකබලා ගැනීම සදහා ඔවුන්ගේ සැමියන්ට අවස්ථාව ලබාදීමට සියලු රෝහල් වල පහසුකම් සැලසිය යුතු බව ආණ්ඩුවේ පාර්ලිමේන්තු මන්ත්‍රීවරයෙකු වන සුදර්ශණ දෙනිපිටිය මහතා විසින් යෝජනාවක් ඉදිරිපත් කලා.
එමගින් පවුල් අතර අනෝන්‍ය සමගිය සහ ආදරය වර්ධනය කරගනිමින් පවතින ගැටුම්ද අඩුකර ගතහැකි බවයි ඔහු පෙන්වා දුන්නේ.
පාර්ලිමේන්තු- මන්ත්‍රී ශානක්‍යයම් රාසමානික්කම් මහතාද එහිදී කල්තැබීමේ විවාදයට එක්වුණා. ආණ්ඩු පක්ෂයේ පසුපෙල මන්ත්‍රීවරයෙකු වන තිස්ස කුට්ටිආරච්චි මහතා විපක්ෂයේ මන්ත්‍රීවරියකට සභා ගැබ තුලදී අසභ්‍ය වචනයෙන් දොස් පැවරීමට එරෙහිව ගෙන ඇති පියවර කවරේදැයි ඔහු රජයෙන් ප්‍රශ්ණ කලා.
