පාසල් දරුවන්ගේ කොවිඩ් මර්ධන එන්නත්කරණ ක්‍රියාවලියේදි දරුවන්ට උපරිම ආරක්ෂාව ලැබෙන පරිදි විධිමත්ව පවත්වාගෙන යාමට කටයුතු කිරීම සෞඛ්‍ය අංශවල අපේක්ෂාව බව රජයේ වෛද්‍ය නිලධාරින්ගේ සංගමය අවධාරණය කරනවා.
රජයේ වෛද්‍ය නිලධාරින්ගේ සංගමය කැදවා තිබූ මාධ්‍ය හමුවකට එක්වෙමින් එහි මධ්‍යම කමිටු සාමාජික වෛද්‍ය ප්‍රසාද් කොළඹගේ මහතා කියා සිටියේ විශේෂඥ වෛද්‍යවරුන්ගේ අධීක්ෂණය යටතේ රෝහල් තුළ මෙම එන්නත්කරණ ක්‍රියාවලිය සිදුකිරීමට යෝජිත බවයි.
ඒ හේතුවෙන් දරුවන් එන්නත්කරණයට යොමුකරවීමට දෙමාපියන් විසින් කිසිදු බියක් ඇතිකර ගැනීමේ අවශ්‍යතාවක් නොමැති බවද ප්‍රසාද් කොළඹගේ මහතා මෙහිදී පෙන්වා දුන්නා.
වයස අවුරුදු 15ත් 19 ත් අතර කිසියම් නිදන්ගත රෝගයකින් පෙළෙන දරුවන් සදහා ප්‍රථමයෙන් එන්නත්කරණය සිදුකරන බවයි ප්‍රසාද් කොළඹගේ මහතා වැඩිදුරටත් අදහස් දක්වමින් කියා සිටියේ.
චීනයේ නිෂ්පාදිත සිනොවැක් එන්නත මෙරටට රැගෙන ඒම සම්බන්ධයෙන්ද මෙම මාධ්‍ය හමුවේදී අවදානය යොමු වුණා.
යම්කිසි එන්නතක් මෙරට ගෙන ඒමෙිදී එය භාවිතයට නිර්දේශ ලබා දීම සම්බන්ධ පූර්ණ වගකීම සෞඛ්‍ය අමාත්‍යංශයේ තාක්ෂණික කමිටුව සතුවන බවයි ප්‍රසාද් කොළඹගේ ප්‍රකාශ කළේ.
ඒ අනුව මෙම සිනොවැක් එන්නත මෙරට භාවිතයට රැගෙන එන්නේද සම්බන්ධ තීරණය සෞඛ්‍ය අංශවල නියාමන සභා සහ එන්නත් සදහාම වන එන්නත් උපදේශ කමිටුව ඇතුලු අදාළ අංශ සමග ඒකමතික තීරණයකට පැමිණ අදාළ එන්නත ආනනයනය කරනවාද නැද්ද යන්න පිළිබදව තීරණය ගත යුතු බවයි ඔහු අවධාරණය කළේ.
