කාබනික කෘෂිකර්මාන්තයක් සඳහා වූ ශ්‍රී ලංකාවේ ප්‍රවේශයට තවත් රටවල් පෙළඹෙනු ඇතැයි තමා අපේක්ෂා කරන බව ජනාධිපති ගෝඨාභය රාජපක්ෂ මහතා පවසනවා.
සැප්තැම්බර් මස පැවැත්වෙන එක්සත් ජාතීන්ගේ මහ මණ්ඩල සැසිවාරයට සමගාමීව ඊයේ ඉතාලියේ රෝම නගරයේ ඇරඹුණු එක්සත් ජාතීන්ගේ ආහාර පද්ධති සමුළුව වීඩියෝ තාක්ෂණය ඔස්සේ අමතමින් ජනාධිපතිවරයා මෙම අදහස් පළ කලා.
ආහාර සඳහා ඇති අයිතිය, මූලික මිනිස් අයිතියක් බැවින් සිය ජනතාව සඳහා එම අයිතිය ආරක්ෂා කිරීමට රජයන් තනිව ක්‍රියා කළ ද ගෝලීය ආහාර පද්ධතියේ පවතින සංකීර්ණතා පිළිබඳව පුළුල්ව අවබෝධ කරගත යුතු බවයි රාජපක්ෂ මහතා එහිදී අවධාරණය කර ඇත්තේ.
දියුණු වාරි ශිෂ්ටාචාරයක් සමග ගැඹුරින් බැඳුණු කෘෂිකාර්මික උරුමයක් සතු ශ්‍රී ලංකාව , තිරසර කාබනික කෘෂිකර්මාන්තයට නැවත වරක් අවස්ථාව ලබාදීමේ උත්සාහය ආරම්භ කර ඇති බවද එහිදී සදහන් කර තිබෙනවා.
එක්සත් ජාතීන්ගේ මහා ලේකම්, ඇන්ටෝනියෝ ගුටරෙස් මහතාගේ ප්‍රධානත්වයෙන් දින තුනක් පුරා පැවැත්වෙන මෙම සමුළුව සදහා රටවල් රැසක රාජ්‍ය නායකයින් සහභාගී වීමට නියමිතයි.
