ඩීසල් මිල රුපියල් 15කින් පහත දැමූවද බස් ගාස්තුවේ කිසිදු වෙනසක් සිදුනොකරන බව ලංකා පෞද්ගලික බස්හිමියන්ගේ සංගමයේ සභාපති ගැමුණු විජේරත්න පවසයි.
අද (01) පැවති මාධ්‍ය හමුවකට එක්වෙමින් ඒ මහතා වැඩිදුරටත් සඳහන් කර සිටියේ, පොදු ප්‍රවාහන සේවය ගුණාත්මක සේවයක් කිරීමට අමාත්‍යවරයා කිසිදු පියවරක් මේ වන තෙක් ගෙන නොමැති බවය.
“අවාසනාවකට අමාත්‍යවරයා පහුගිය කාලය පුරාම අමාත්‍ය ධුරය දැරුවත් පොදු ප්‍රවාහන සේවාව ගුණාත්මක පැත්තට තල්ලු කරන්න කටයුතු කළේ නෑ. ඒකේ විපාකය අද ජනතාවට විඳින්න වෙලා. විශේෂයෙන්ම කියන්න ඕනේ ඩීසල් රු 15කින් අඩු කරාට අපිට ජනතාව වෙනුවෙන් ඒ ප්‍රතිලාභය දෙන්න ප්‍රායෝගිකව හැකියාවක් නෑ. මොකද හේතුව තමා රුපියලක්, රුපියල් දෙකක් අඩු කරලා, ඒක ප්‍රායෝගිකව ජනතාවට ලැබෙන්නෙත් නෑ ඒ වාසිය. අපිට ලැබෙන්නෙත් නෑ. ඒ නිසා සංගමය විදියට තීරණය කළා යම් ආකාරයක අපිට විද්‍යුත් ක්‍රමවේදයක් තුළ අපිට ප්‍රවේශපත්‍රයක් ලබා ගැනිමින් කොන්දොස්තරවරයා ඇතුව හෝ නැතුව විද්‍යුත් ක්‍රමවේදය මත කාඩ් පතකින් ජනතාවට මුදල් ගෙවන්න ක්‍රමවේදය සැලසුම් කළොත් අපිට අනිවාර්යයෙන්ම මේ සහනය අපිට ජනතාවට දෙන්න පුළුවන්. ආණ්ඩුව ඒ ව්‍යාපෘතිය හෙට දුන්නොත් අපිට හෙට බස් ගාස්තුව අඩුකරන්න පුළුවන්. එහෙම නැතුව කිසිසේත්ම මේ බස් ගාස්තුව අපිට අඩුකරන්න පුළුවන් කමක් නෑ. මොකද හේතුව ප්‍රායෝගිකව මේ සහනය ජනතාවට ලැබෙන්නේ නෑ…”
ඉන්ධන මිල ගණන් පහත දැමූවද ත්‍රිරෝද රථ ගාස්තුවේ කිසිදු වෙනසක් සිදුනොකරන බව සමස්ත ලංකා ත්‍රීරෝද රථ රියදුරන්ගේ වෘත්තීය සමිතිය පවසයි.
එහි සභාපති ලලිත් ධර්මසේන මහතා අද (01) උදෑසන මාධ්‍ය වෙත අදහස් දක්වමින් පවසා සිටියේ, රුපියල් 7කින් වැනි සුළු මුදලකින් පෙට්‍රල් මිල පහත දැමීම ගාස්තු වෙනසක් සිදුකිරීමට ප්‍රමාණවත් නොවන බවය.
වැඩිදුරටත් අදහස් දැක්වු ඒ මහතා,
“මේ රුපියල් 7 අඩු කිරීම නිසා සහනයක් නෙමෙයි අසහනයක් ඇතිවුණේ. ධනපතියාට එයාගේ බර අඩුකරනවා. අපිට සල්ලි දීලවත් අවශ්‍ය තරම් පෙට්‍රල් ප්‍රමාණය දෙන්නේ නැහැ. ඒ නිසා ඔය රුපියල් 7 අඩු නොකරාට කමක් නැහැ. විශේෂයෙන් හයර් දුවන ත්‍රීරෝද රථ රියදුරාට අවශ්‍ය පෙට්‍රල් ප්‍රමාණය දෙන්න කියලා ආණ්ඩුව කියන්න. මොනම හේතුවක් නිසාවත් ගාස්තුව අඩු කරන්නේ නැහැ.”
