ලබන වසරේ පැවැත්වීමට නියමිත පළාත් පාලන මැතිවරණය සඳහා අවශ්‍ය මූලික කටයුතු මේවනවිට ආරම්භ කර ඇති බව මැතිවරණ කොමිෂන් සභාව පවසනවා.
එහි ජ්‍යෙෂ්ඨ ප්‍රකාශකයෙකු සඳහන් කළේ ඡන්ද විමසීම සඳහා මධ්‍යස්ථාන සකස් කිරීම, අවශ්‍ය රථවාහන සූදානම් කිරීම හා කාර්යය මණ්ඩලය සකස් කිරීම ඇතුළු කටයුතු මේවනවිටත් සිදුකෙරෙමින් පවතින බවයි.
ගැටලු කිහිපයක් මතුව පැවැතිය ද පළාත් පාලන මැතිවරණය නියමිත කාලසීමාවේ දී පැවැත්වීමට හැකියාව පවතින බව නීතිපතිවරයා විසින් මැතිවරණ කොමිෂන් සභාව වෙත දැනුම් දී තිබේ.
කෙසේවෙතත් මැතිවරණ කොමිෂන් සභාවේ ඒකමතික තීරණය අනුව මැතිවරණය පැවැත්වීමට හැකියාව පවතින බවද නීතිපතිවරයා දැනුම් දී ඇති බව සඳහන්ය.
ඒ අනුව පළාත් පාලන මැතිවරණය පැවැත්වීම සම්බන්ධයෙන් තවදුරටත් සාකච්ඡා කරමින් පවතින බව මැතිවරණ කොමිෂන් සභාව සඳහන් කළේය.
පළාත් පාලන සීමා නිර්ණ කමිටුව හේතුවෙන් පළාත් පාලන මැතිවරණය ප්‍රකාශයට පත්කිරීම සම්බන්ධයෙන් නීතිපතිවරයාගේ උපදෙස් පැතීමට මැතිවරණ කොමිසම පසුගිය දා තීරණය කරනු ලැබීය.
ඒ අනුව ඊට අදාළ නීතිපති නිර්දේශය මේ වන විට මැතිවරණ කොමිෂන් සභාව වෙත ලැබී තිබේ.
පවතින තත්ත්වය මත මැතිවරණය පවත්වන්නේ නම් ජනවාරි 5ට පෙර එය අනිවාර්යෙන්ම ගැසට් මගින් ප්‍රකාශයට පත්කළ යුතු බව මැතිවරණ කොමිෂන් සභාව සඳහන් කළේය.
මේ අතර මැතිවරණ කොමිෂන් සභාවේ රැස්වීමක් මෙම සතියේ දී පැවැත්වීමට ද නියමිතව තිබේ.
