මෙරටතුළ සේවයේ නියුතු ගෘහ සේවක ප්‍රජාවට ද සේවක අර්ථසාධක ඇතුළු මෙරට වැඩකරන පන්තියට අදාළ කම්කරු අයිතිවාසිකම් ලබාදෙන බව කම්කරු අමාත්‍ය නිමල් සිරිපාල ද සිල්වා මහතා පවසනවා.
මෙම කම්කරු ප්‍රජාවගේ සුභසාධනය හා සුරක්ෂාව වෙනුවෙන් මෙතෙක් නිශ්චිත කම්කරු නීති ආවරණයක් නොතිබීම කනගාටුවට කරුණක් බවයි අමාත්‍යවරයා පවසන්නේ.
එම නිසා ඉතාම කඩිනමින් මෙම ගෘහස්ථ කම්කරුවන්ට ද කම්කරු අයිතිවාසිකම් ලබාදීමේ නීති සම්පාදනය කරන බවයි ගෘහස්ථ කම්කරුවන් අයිතිවාසිකම් පිළිබඳ කටයුතු කරන ආයතන කිහිපයක නියෝජිතයින් සමග කම්කරු අමාත්‍යාංශයේ ඊයේ (10) පැවති සාකච්ඡාවකදී අමාත්‍යවරයා කියා සිටියේ.
ගෘහස්ථ කම්කරුවන් සඳහා පඩි පාලක සභාවක් පිහිටුවීමට සහ ඔවුන් හට සේවක අර්ථසාධක අරමුදල හා සේවා නියුක්තියන්ගේ භාර අරමුදලේ සාමාජිකත්වය ලබා දීම සිදු කිරීමට අදාළ පනත් කෙටුම්පත් සංශෝධනය කඩිනමින් අමාත්‍ය මණ්ඩලයට ඉදිරිපත් කරන බව අමාත්‍යවරයා මෙහිදී සදහන් කළා.
ගෘහ සේවක සේවිකාවන් අලෙවිකරණ තැරැව්කරුවන් සහ ඊට අදාල ආයතන තහනම් කළ යුතු බවයි නිමල් සිරිපාල ද සිල්වා මහතා අවධාරණය කළේ.
මේ වන විට රට පුරා 85,000 ආසන්න පිරිසක් ගෘහස්ථ කම්කරුවන් ලෙස සේවය කරන බව මෙම සාකච්ඡාවවේදී සදහන් කෙරුණා.
