අනාරක්ෂිත ගෘහස්ත ගෑස් සිලින්ඩර ආනයනය කර බෙදා හැරීමට කටයුතු කළ ගෑස් සමාගම් හා වගකිවයුතු පිරිසට එරෙහිව අපරාධ නීතිය යටතේ නීතිමය පියවර ගන්නා ලෙස නීතිපතිවරයාට හා පොලිස්පතිවරයාට නියෝග කරන්නැයි ඉල්ලා ගොණුකල රිට් පෙත්සම සළක බැලීම සඳහා හෙට දිනයේදී කැඳවන ලෙස අභියාචනාධිකරණය අද නියම කලා.
සභාපති විනිසුරු ප්‍රියන්ත ප්‍රනාන්දු සහ සම්පත් අබේකෝන් යන විනිසුරු මඩුල්ල විසිනුයි නියෝගය ලබාදුන්නේ.
සිවිල් සමාජ ක්‍රියාකාරී නාගානන්ද කොඩිතුවක්කු මහතා විසිනුයි එය ගොණු කර ඇත්තේ.
ඉන් ඉල්ලා ඇත්තේ අනාරක්ෂිත ගෘහස්ත ගෑස් සිලින්ඩර් පුපුරායාමෙන් අනතුරට පත් පිරිසට වන්දි ගෙවීමට, ලාෆ් හා ලිට්රෝ ගෑස් සමාගම්වලට නියෝග කරන ලෙසයි.
මේ අතර ගෑස් ප්‍රශ්නය සම්බන්ධයෙන් රාජ්‍ය ආයතනවල නොසැලකිල්ල පිළිබඳව විමර්ශනයක් කරන ලෙස ශ්‍රී ලංකා තරුණ ජනමාධ්‍යවේදීන්ගේ සංගමය ඇතුළු සමාජ ක්‍රියාකාරීන් පිරිසක් කල පැමිණිවලට අනුව ශ්‍රී ලංකා ප්‍රමිති ආයතනය, පාරිභෝගික කටයුතු අධිකාරිය සහ පාරිභෝගික ආරක්ෂණ රාජ්‍ය අමාත්‍යංශ යන ආයතන තුන අද දිනයේදී ශ්‍රී ලංකා මානව හිමිකම් කොමිෂන් සභාව හමුවේ පෙනී සිටියා.
මේ අතර ගෑස් ටැංකි පුපුරා යාම සහ ඒවායේ සංයුතිය පිළිබඳව මතුව ඇති තත්ත්වය සම්බන්ධයෙන් විමසා බැලීමට සමගි ජන බලවේගයේ පාර්ලිමේන්තු මන්ත්‍රීවරු කණ්ඩායමක් කෙළවරපිටියේ පිහිටි ලිට්රෝ සමාගම අද නිරීක්ෂණය කලා.
සමගි ජන බලවේගයේ පාර්ලිමේන්තු මන්ත්‍රීවරුන් වන f–. සී. අලවතුවල, මුජුබර් රහුමාන්, හෙක්ටර් අප්පුහාමි, එස්. වේලූකුමාර් යන මහත්වරුන් ඇතුළු පිරිසක් මෙම අවස්ථාවට එක්ව සිටියා.
අනතුරුව මාධ්‍ය හමුවේ අදහස් දැක්වූ පාර්ලිමේන්තු මන්ත්‍රී මුජුබර් රහුමාන් මහතා පැවසුවේ පසුගිය දිනවල ගෑස් සංයුතියේ යම් යම් වෙනස්වීම් සිදු වූ බවට නිළධාරීන් පිළිගත් බවයි.
සමගි ජන බලවේගය ලෙස මේ සම්බන්ධයෙන් ඉදිරි ක්‍රියාමාර්ග ගන්නා බවද මන්ත්‍රීවරයා ප්‍රකාශ කලා.
