නව වසර සැමරීම සඳහා ගම්බිම් බලා යන ජනතාව වෙනුවෙන් විශේෂ බස් සේවා ක්‍රියාත්මක කර ඇතැයි ජාතික ගමනාගමන කොමිෂන් සභාව පවසයි.
එහි අධ්‍යක්ෂ ජනරාල්, ආචාර්ය නිලාන් මිරැන්ඩා මහතා ප්‍රකාශ කළේ, ගම්බිම් බලා ගිය ජනතාවට නැවත කොළඹ දක්වා පැමිණීමට අවශ්‍ය බස් සේවාවක් 01 වැනිදායින් පසුව ක්‍රියාත්මක කෙරෙන බවත්,කොළඹ සිට පිට පළාත් වෙත බස් සේවා ක්‍රියාත්මක කරමින් මගී ජනතාවට අපහසුවකින් තොරව සිය ප්‍රවාහන අවශ්‍යතා සපුරා ගැනීමට අවශ්‍ය බස් සේවාවක් ක්‍රියාත්මක බවය.
එසේම 1955 ක්ෂණික ඇමතුම් අංකය ඇමතීමෙන් මගී ජනතාවගේ ප්‍රවාහන ගැටළු සම්බන්ධයෙන් දැනුම් දිය හැකි බවත්,මගී ජනතාවට අවශ්‍ය තොරතුරු ලබා ගැනීමටත් මේ ඔස්සේ ඉඩ සලසා ඇති බව ඔහු ප්‍රකාශ කළේ ය.
මේ අතර ලංකා ගමනාගමන මණ්ඩලය ද නව වසර වෙනුවෙන් විශේෂ බස් සේවාවක් ආරම්භ කර තිබේ.
ඒ පිළිබඳව අදහස් දක්වමින්, එහි නියෝජ්‍ය සාමාන්‍යාධිකාරි පණ්ඩුක ස්වර්ණහංස මහතා පැවසූවේ,කොළඹ ප්‍රධාන බස් නැවතුම්පොළේ සිට මෙම විශේෂ බස් රථ සේවාව අද (01) සිට 03 වැනිදා දක්වා ක්‍රියාත්මක කිරීමට නියමිත බවය.
ඒ අනුව ගම්බිම් බලා ගොස් නැවත කොළඹ දක්වා පැමිණෙන ජනතාව වෙනුවෙන් අතිරේක බස් රථ දිවයිනම ආවරණය වන පරිදි යෙදවීමට කටයුතු කර ඇති බවද ඔහු ප්‍රකාශ කළේ ය.
