ශ්‍රී ලංකා රුපියල් කෝටි 200 කට වැඩි වටිනාකමින් යුත් ආධාර තොගයක් ඉන්දියාවේ තමිල්නාඩු ප්‍රාන්තයේ සිට අද පස්වරුවේ කොළඹ වරායට ළගාවුණා.
සහල් මෙට්‍රික් ටොන් 9000 ක් / කිරිපිටි ටොන් 50 ක් සහ ඖෂධ හා වෛද්‍ය උපකරණ ටොන් 25 ක් මේ අතර වනවා.
කොළඹ සිටින ඉන්දීය මහ කොමසාරිස් ගෝපාල් බාග්ලේ විසින් මෙම ද්‍රව්‍ය විදේශ අමාත්‍ය මහාචාර්ය ජී එල් පීරිස් මහතා වෙත කොළඹ වරායේදී භාරදෙනු ලැබුවා.
මෙම ද්‍රව්‍ය පසුගිය 18 වනදා තමිල්නාඩුවෙන් ශ්‍රී ලංකාව බලා පිටත්වුණා. තමිල්නාඩු රජය විසින් ශ්‍රී ලංකාවට රුපියල් කෝටි 550 කට අධික වටිනාකමින් යුත් සහල් මෙට්‍රික් ටොන් 40,000 ක් – කිරිපිටි ටොන් 500 ක් සහ ඖෂධ සැපයීමට එකගවු අතර අද මෙලස ළගාවුයේ එහි පළමු තොගයයි.
ඒවා උතුර – නැගෙනහිර – මධ්‍යම සහ බස්නාහිර පළාත්වල අවශ්‍යතා සහිත ජනතාව වෙත බෙදා හැරෙන බව කොළඹ පිහිටි ඉන්දීය මහ කොමසාරිස් කාර්යාලය නිවේදනය කලා.
