චීනයේ නේවාසිකව අධ්‍යයන කටයුතු කරමින් සිට කොවිඩ් වසංගතය හේතුවෙන් නැවත මෙරටට පැමිණි ලාංකික සිසුන්ට නැවත චීනයට යාමේ අවස්ථාව කඩිනමින් සලසා දෙන්නැයි අධ්‍යාපන අමාත්‍ය දිනේෂ් ගුණවර්ධන මහතා ශ්‍රී ලංකාවේ චීන තානාපති චී ජෙන්හොන් මහතාගෙන් ඉල්ලීමක් කර තිබෙනවා.
අදාල සිසුන් මාර්ගගතව අධ්‍යාපන කටයුතු සිදු කළ ද වෛද්‍ය අධ්‍යාපනය වැනි කටයුතු ප්‍රායෝගිකව කළ යුතු බැවින් නැවත ඔවුන්ට චීනයට යාම අවශ්‍ය බවයි මෙහිදි සදහන් කෙරුණේ.
අධ්‍යාපන අමාත්‍යවරයා මෙම අදහස් පළ කලේ මෙරට චීන තානාපතිවරයා සමග අධ්‍යාපන අමාත්‍යාංශයේ පැවති සාකච්ඡාවකට එක්වෙමින්.
මෙරට දෙලක්ෂ තිස්දහස ඉක්ම වූ ගුරු භවතුන් සඳහා එන්නත්කරණය කඩිනම් කළ හැකි වුයේ චීනයෙන් ලද සහයෝගය නිසා බවද දිනේෂ් ගුණවර්ධන මහතා සිහිපත් කළා.
චීන ශ්‍රී ලංකා විශ්ව විද්‍යාල අතර අන්තර් හුවමාරු අධ්‍යයන ක්‍රමවේද ඇති කිරීම මෙන්ම ශ්‍රී ලංකාවේ ග්‍රාමීය පාසල්හි තොරතුරු තාක්ෂණ පහසුකම් දියුණු කිරීමට චීනයෙන් ලබාගත හැකි සහයෝගය පිළිබඳව ද මෙහිදි අවධානය යොමුවුනා.
ජනාධිපති ගෝඨාභය රාජපක්ෂ මහතා විසින් කෘෂි තාක්ෂණික විශ්ව විද්‍යාලයක් හම්බන්තොට ස්ථාපිත කිරීමට චීන රජයෙන් ඉල්ලා ඇති අතර ඒ පිළිබඳව වැඩි අවධානයක් යොමු කරන්නැයිද අධ්‍යාපන අමාත්‍යවරයා ඉල්ලිමක් කළා.
හම්බන්තොට වරාය හා කර්මාන්තපුරය පිළිබඳව පිරික්සීමේ දී ශ්‍රී ලංකාවට දීප්තිමත් අනාගතයක් කරා යා හැකි මංපෙත් විවර වී ඇති බව චීන තානාපතිවරයා සදහන් කළ බවයි අධ්‍යාපන අමාත්‍යාංශයේ මාධ්‍ය ඒකකය නිවේදනය කළේ.
