සංකූලතා නොමැති, වයස අවුරුදු 2 ත් 60 ත් අතර කොවිඩ් ආසාදිතයින් වෛද්‍යවරුන්ගේ අධීක්ෂණය යටතේ නිවෙස් තුල රැකබලා ගැනිමේ වැඩසටහන රත්නපුර දිස්ත්‍රීක්කය තුළ අද (14) ආරම්භ කෙරුණා.
වෛරසය ආසාදිතයින් වෛද්‍ය අධීක්ෂණය මත නිවෙස් තුල රැක බලා ගැනීමේ වැඩසටහන මුලින්ම ආරම්භ කරනු ලැබුවේ බස්නාහිර පළාතෙන්.
ක්‍රමානුකූලව දිවයිනම ආවරණය පරිදි ඉදිරියේ දී මෙම වැඩපිළිවෙල ක්‍රියාත්මක කිරීමට සැළසුම් කර ඇති බවයි සෞඛ්‍ය අමාත්‍යංශය සදහන් කළේ.
නිවෙස් තුළ රැකබලා ගන්නා කොවිඩ් ආසාදිතයින් අධීක්ෂණය කිරීමේ වැඩසටහන සදහා වෛද්‍යවරුන් 1000ක් පමණ අනුයුක්ත කර ඇති බවත් පූර්ව සීමාවාසික පත්වීම් අපෙක්ෂාවෙන් සිටින වෛද්‍යවරුන් 426 කට ද මේ අනුව පුහුණූව ලබාදී ඇති බවත් සෞඛ්‍ය අමාත්‍යංශය නිවේදනය කළා.
ප්‍රදේශයේ සෞඛ්‍ය වෛද්‍ය නිලධාරී විසින් ඔවුනට ලබාදී ඇති මාර්ගෝපදේශ හා නිර්ණායකයන්ට අනුකූලව කොවිඩ් ආසාදිතයින් නිවෙස් තුල ප්‍රතිකාර සදහා ලියාපදිංචි කරනු ලබනවා.
එලෙස ලියාපදිංචි කරනු ලබන රෝගීන්ට සම්බන්ධ වීම සදහා පමණක් පැය 24 පුරා ක්‍රියාත්මක ප්‍රධාන දුරකථන මධ්‍යස්ථානයක් ස්ථාපිත කර ඇති 1390 එම ක්ෂණික ඇමතුම් අංකයයි.
මෙහිදී රෝගියා නිවෙස් තුල ප්‍රතිකාර ලබාගන්නේ නම් ඒ සදහා තම කැමැත්ත ද පළ කළ යුතුයි.
කෙසේ වෙතත් සංකූලතා පෙන්වන සහ බරපතල තත්වයේ පසුවන සියලුම කොවිඩ් ආසාදිතයින් සාමාන්‍ය පරිදි ප්‍රතිකාර මධ්‍යස්ථාන වෙත යොමුකිරීම අඛණ්ඩව සිදුකරන බවයි සෞඛ්‍ය අමාත්‍යංශය අවධාරණය කරන්නේ.
