කැළණි ගංගාවට අපද්‍රව්‍ය බැහැර කරන පිරිස් අත්අඩංගුවට ගැනීම සදහා හංවැල්ල සිට පෑලිගොඩ දක්වා පාළම් කිහිපයකට සී සී ටි වී කැමරා සවි කිරීමට තීරණය වී තිබෙනවා.
එමෙන්ම කැළිකසළ ගගට වැටීම වැළැක්වීමට පාළම් යටින් දැල් සවිකිරීමටද නියමිතයි.
මෙරට 103 කින් සමන්විත සමස්ත ගංගා පද්ධතියෙන් දූෂිතම ජලය සහිත ගංගාව ලෙස මේවනවිට කැළණි ගග හඳුනාගෙන තිබෙනවා.
මධ්‍යම පරිසර අධිකාරිය විසින් සමස්ත ගංගා පද්ධතියම ආශ්‍රිතව සිදු කරන ලද සමීක්ෂණයකට අනුව සියලුම ගංගාවලට අපද්‍රව්‍ය බැහැර කරන ස්ථාන 10 දහස් 733 ක් ඇති බවටයි තහවුරු කර ගෙන ඇත්තේ.
කැළණි ගග ආශ්‍රිතව පමණක් එවැනි අපද්‍රව්‍ය බැහැර කරන ස්ථාන 1374 ක් හඳුනාගෙන ඇති අතර ඉන් කොළඹ නගරය ආශ්‍රිතව ස්ථාන 797 ක් හා ගම්පහ දිස්ත්‍රික්කය ආශ්‍රිතව ස්ථාන 577 ක් ඇතුළත්.
කොළඹ දිස්ත්‍රික්කයේ ජනතාවගෙන් සියයට 80 ක පානීය ජල අවශ්‍යතාවය සපුරනු ලබන්නේ කැළණි ගංගාව මගින් වන අතර මේ වනවිට කැළණි ගගට විවිධ ආයතන හා පුද්ගලයින් කැළිකසල හා අපද්‍රව්‍ය බැහැර කිරීම නිසා එම ගග මුළුමනින්ම දූෂිත තත්ත්වයට පත්ව ඇති බව නිරීක්ෂණ වී ඇතැයි සදහන්.
විශේෂයෙන් සීතාවක හා බියගම කර්මාන්තපුරවල පිහිටි ඇතැම් කර්මාන්ත ශාලා විසින් බැහැර කරන අපද්‍රව්‍ය කැළණි ගගට මුසුවන බව දැකගත හැකි බවයි පරිසර අමාත්‍යංශය නිවේදනය කළේ.
