ඔමික්‍රොන් දරුනු කොවිඩ් ප්‍රභේදය ශ්‍රී ලංකාව තුළට ඇතුලුවී ඇත්දැයි තහවුරු කරගැනීම සඳහා සිදුකරන විශේෂ ජාන විශ්ල්ෂණ පරික්ෂණයේ ප්‍රතිඵලය මෙම සති අන්තයේදී සෞඛ්‍ය අමාත්‍යංශය වෙත භාරදෙන බව ශ්‍රී ජයවර්ධනපුර විශ්ව විද්‍යාලයේ වෛද්‍ය පීඨයේ ආසාත්මිකතා ප්‍රතිශක්තිවේද සහ සෛල ජෛව විද්‍යා අධ්‍යයන අංශයේ ප්‍රධානී ආචාර්යය චන්දිම ජීවන්දර මහතා පවසනවා.
විදේශයන්ගෙන් පැමිණි පුද්ගලයන්ගෙන් ලබාගත් සාම්පල මෙලෙස පරික්ෂණයට ලක්කර ඇති අතර මෙම පරික්ෂණය ඉදිරි දින දෙක තුළ අවසන් කරන බවයි ඔහු පවසන්නේ.
ඔමික්‍රොන් කොවිඩ් ප්‍රභේදය පිළිබඳ කරුනු පැහැදිලි කිරීම සඳහා ජනාධිපති මාධ්‍ය කේන්ද්‍රය අද සංවිධානකර තිබූ මාධ්‍ය හමුවට එක්වෙමිනුයි චන්දිම ජීවන්දර මහතා මේ බව සඳහන් කළේ.
ඔමික්‍රොන් කොවිඩ් ප්‍රභේදයේ හැසිරීම සම්බන්ධයෙන් ශ්‍රී ජයවර්ධනපුර විශ්ව විද්‍යාලයේ මහාචාර්ය නීලිකා මළවිගේ මහත්මියද මෙම මාධ්‍ය හමුවේදී කරුණු පැහැදිලි කළා.
ඔමික්‍රොන් නමැති දරුණු ප්‍රභේදය රටකට ඇතුලුවීම වැළැක්වීමට සීමා දැමිීම ඵලක් නොවන බවත් ආරක්ෂාකාරීව සූදානම්වීම සුදුසුම ක්‍රියාමාර්ගය බවත් ඇය අවධාරණය කළා.
