කොවිඩ් මර්දන එන්නත්කරණ වැඩපිළිවෙළ සඳහා යෙදවූයේ වෛද්‍ය අධ්‍යාපනය ලැබූ යුධ හමුදා වෛද්‍ය බලකාය බව ආරක්ෂක ලේකම් විශ්‍රාමික ජනරාල් කමල් ගුණරත්න මහතා පවසනවා.
එන්නත්කරණය පිළිබඳ නොදන්නා පිරිසක් ඒ සඳහා යොදවා ඇතැයි ඇතැම් පුද්ගලයින් සිදු කරන චෝදනා පදනම් විරහිත බවයි ලේකම්වරයා පෙන්වා දුන්නේ.
ආරක්ෂක අමාත්‍යාංශයේ පැවැති මාධ්‍ය හමුවකට එක්වෙමින් කමල් ගුණරත්න මහතා මේ බව කියාසිටියා.
එන්නත්කරණය සඳහා කාලතුවක්කු රෙජිමේන්තුව කිසිදු අවස්ථාවක භාවිත නොකල බවද වෛද්‍ය බලකායෙන් එන්නත් ලබාගැනීමට කිසිදු බියක් ඇතිකර ගත යුතු නැතැයිද ආරක්ෂක ලේකම්වරයා සඳහන් කලා.
සෞඛ්‍ය සේවක වර්ජන රැල්ලක් පැමිණි බැවින් වසංගතය හමුවේ ජීවිත තර්ජනය අවම කර ගැනීම සඳහා ශ්‍රී ලංකා යුධ හමුදා වෛද්‍ය බලකාය මෙම එන්නත්කරණ වැඩපිළිවෙලට මැදිහත් වූ බව විශ්‍රාමික ජනරාල් කමල් ගුණරත්න මහතා ප්‍රකාශ කලා.
ඒ අනුව 2000 ත් 3000 ත් අතර පැවති දෛනික එන්නත්කරණ වැඩපිළිවෙළ දිනකට ලක්ෂ 05 ක් වැනි ඉහළ අගයකට ගෙන ඒමට හැකි වූ බවයි ඔහු වැඩිදුරටත් කියාසිටියේ.
