එක්ස්ප්‍රස් පර්ල් නෞකාව ගිනි ගැනීමට ලක්වීමේ සිද්ධිය පිළිබඳ අපක්ෂපාතී හා ස්වාධීන පරීක්ෂණයක් පවත්වන ලෙස රජය වෙත නියෝගයක් නිකුත් කරන්නැයි ඉල්ලා අභියාචනාධිකරණය හමුවට රිට් පෙත්සමක් ඉදිරිපත් වී තිබෙනවා.
පරිසර යුක්ති කේන්ද්‍රය ඇතුලු පාර්ශව 03 ක් විසිනුයි මෙම පෙත්සම ඉදිරිපත් කර ඇත්තේ.
එහි වගඋත්තරකරුවන් ලෙස මධ්‍යම පරිසර අධිකාරිය / ශ්‍රී ලංකා වරාය අධිකාරිය සහ එහි සභාපතිවරයා / වරාය අමාත්‍ය රෝහිත අබේගුණවර්ධන / පරිසර අමාත්‍ය මහින්ද අමරවීර ඇතුලු 16 දෙනෙකුයි නම් කර ඇත්තේ.
පෙත්සම්කරුවන් කියා සිටින්නේ එක්ස්ප්‍රස් පර්ල් නෞකාව ගිනි ගැනීමේ සිද්ධිය සම්බන්ධයෙන් මේ දක්වා ස්වාධීන පරීක්ෂණයක් සිදුකිරීමට වග උත්තරකරුවන් පියවර ගෙන නොමැති බවයි.
එම ගිනි ගැනීමේ සිද්ධිය හේතුවෙන් විශාල සාගරික මෙන්ම පාරිසරික හානියක් සිදු වූ බවද පෙත්සමෙන් පෙන්වා දී තිබෙනවා.
ඒ අනුව එක්ස්ප්‍රස් පර්ල් නෞකාව ගිනි ගැනීමේ සිද්ධිය පිළිබඳ අපක්ෂපාතී හා ස්වාධීන පරීක්ෂණයක් පවත්වන ලෙස වගඋත්තරකරුවන් වෙත රිට් ආඥාවක් නිකුත් කරන්නැයි පෙත්සමෙන් ඉල්ලා තිබෙනවා.
එමෙන්ම නෞකාව ගිනිගැනීම නිසා මුහුදුබත් වූ සහ ගොඩබිමට එක්වූ ප්ලාස්ටික් අපද්‍රව්‍ය ඇතුළු විවිධ ද්‍රව්‍ය පරිසර හිතකාමී ආකාරයට ඉවත් කිරීමට පියවර ගන්නා ලෙස අදාළ නෞකා සමාගම් වෙත නියෝගයක් නිකුත් කරන මෙන්ද පෙත්සමෙන් වැඩිදුරටත් ඉල්ලා තිබෙනවා.
