ශ්‍රී ලංකා මුහුදුසීමාවේදී මුහුදුබත්වූ එක්ස්ප්‍රස් පර්ල් නෞකාවෙන් මේ වනවිට ඉන්ධන කාන්දුවක් සිදුවන බවට තමන්ට තොරතුරු ලැබී ඇතැයි විපක්ෂ නායක සජිත් ප්‍රේමදාස මහතා අනාවරණය කරනවා.
ඒ හෝමාගම නගරයේ ඊයේ පස්වරුවේ පැවති විරෝධතාවකදීයි.
ජීවන මිල ඉහළයාම – පොහොර හිගය – දරුවන්ගේ අධ්‍යාපන කටයුතු බිදවැටීම ඇතුලූ ගැටලූ කිහිපයකට විසදුම් ඉල්ලමිනුයි සමගි ජන බලවේගය මෙම විරෝධතාව සංවිධාන කර තිබුණේ.
එක්ස්ප්‍රස් පර්ල් නෞකාවේ ඉන්ධන කාන්දුවක් සිදුවන්නේ නම් එය බරපතල ව්‍යසනයක් බවට පත්වන බවත් ආණ්ඩුව වහා මේ සම්බන්ධයෙන් රටට කරුණු අනාවරණ කළ යුතු බවත් විපක්ෂ නායක සජිත් ප්‍රේමදාස මහතා මෙහිදී අවධාරණය කළා.
සමගි ජන බලවේගයේ පාර්ලිමේන්තු මන්ත්‍රි ආචාර්ය හර්ෂ ද සිල්වා මහතාද මෙහිදී මාධ්‍යයට අදහස් දැක්වුවා.
ලීටර් 18 ක නව ගෑස් සිලින්ඩරයට නියම කර ඇති මිල මගින් ආණ්ඩුව ගෑස් සිලින්ඩරයක මිල සියයට 12 කින් සූක්ෂම ආකාරයෙන් ඉහළ දමා ඇති බව මන්ත්‍රීවරයා පෙන්වා දුන්නා.
