නිමල් පුංචිහේවා මහතා,
එස්.බී. දිවාරත්න මහතා,
එම්.එම්. මොහොමඩ් මහතා,
කේ.පී.පී. පතිරණ මහතා,
පී.එස්.එම්. චාල්ස් මහත්මිය,
මැතිවරණ කොමිෂන් සභාව,
සමන් ශ්‍රී රත්නායක මහතා,
මැතිවරණ මහලේකම් කාර්යාලය,
සරණ මාවත,
රාජගිරිය.
ගරු සභාපතිතුමනි / කොමසාරිස්වරුනි / මැතිවරණ කොමසාරිස් ජනරාල්තුමනි,
ආණ්ඩුක්‍රම ව්‍යවස්ථාවේ 104 – 4(ආ) වගන්තියට අනුව සියලුම රාජ්‍ය නිලධාරීන්, ව්‍යවස්ථාපිත මණ්ඩල සංස්ථා ඇතුළු සියලුම රාජ්‍ය නිලධාරින් මැතිවරණ කොමිෂන් සභාවේ උපදෙස් වලට අනුකූලව කටයුතු කළ යුතු බව දක්වා ඇති අතර කිසිදු සාධාරණ හේතුවකින් තොරව මැතිවරණ කොමිෂන් සභාවේ උපදෙස් නොසලකා හැරීම, ඊට අනුව ක්‍රියා නොකිරීම වසර තුනක සිර දඬුවමක් සහ රුපියල් ලක්ෂයකට නොඅඩු දඩයක් හෝ ඒ දෙකම ලබා දිය හැකි වරදක් බව ආණ්ඩුක්‍රම ව්‍යවස්ථාවේ 104 උඋ.1 ආ වගන්තිය යටතේ දක්වා ඇත.
එවැනි පරිසරයක් තුළ පරිපාලන සේවයේ ජ්‍යෙෂ්ඨතම නිලධාරියෙකු වන රාජ්‍ය පරිපාලන හා පළාත් පාලන හා පළාත් සභා අමාත්‍යාංශයේ ලේකම්වරයා විසින් පළාත් පාලන ඡන්ද විමසීමට අදාලව ඇප තැන්පත් බාර නොගන්නා ලෙසට සියලුම දිස්ත්‍රික් ලේකම්වරුන් වෙත ලිපියක් හරහා දැන්වීම මගින් ඔහු දැන දැනම ව්‍යවස්ථාවේ 104 වගන්තිය උල්ලංඝනය කර ඇති බව පෙනීයයි. රාජ්‍ය පරිපාලන ක්‍රියාවලියේදී දිස්ත්‍රික් ලේකම්වරුන්, ප්‍රාදේශීය ලේකම්වරුන් ඇතුළු සමස්ත පරිපාලනයට නායකත්වය දෙන රාජ්‍ය පරිපාලන හා ස්වදේශ කටයුතු අමාත්‍යාංශයේ ලේකම්වරයා මෙවැනි වරදක් සිදුකිරීම සුළු කොට තැකිය නොහැක. විශේෂයෙන්ම ජනතාවගේ ප්‍රජාතන්ත්‍රවාදී අයිතිය භාවිත වන මැතිවරණයක් ප්‍රකාශයට පත්කර තිබෙන මොහොතක පරිපාලන නිලධාරියෙකු මෙවැනි ලිපියක් නිකුත් කිරීම සමස්ත රාජ්‍ය සේවයටම අගෞරවයක් වන අතර අනාගතයට වැරදි පූර්වාදර්ශයක් සපයන්නකි.
තමාගේ ඉහළ නිලධාරීන් වැරදි උපදෙස් ලබා දෙන්නේ නම් හෝ ව්‍යවස්ථා විරෝධී උපදෙස් ලබා දෙන්නේ නම් ඊට එරෙහිව කටයුතු කිරීමට පරිපාලන සේවයේ ජ්‍යෙෂ්ඨ නිලධාරියෙකු ලෙස ඔහු සමත් විය යුතුය.
එමෙන්ම මැතිවරණ කොමිෂන් සභාවේ සභාපතිතුමා ඇතුළු සාමාජිකයින් ගෙන් අප ඉල්ලා සිටින්නේ ඔබගේ විධානයන් වලට එරෙහිව කටයුතු කරන ලෙස සාධාරණ හේතුවකින් තොරව තේරීම් භාර නිලධාරින්ට උපදෙස් දීමට ක්‍රියා කළ අදාල අමාත්‍ය අමාත්‍යංශ ලේකම්වරයා සම්බන්ධයෙන් ව්‍යවස්ථා ප්‍රකාරව අවශ්‍ය නීතිමය පියවර ගන්නා ලෙසයි.
අපගේ මෙම ඉල්ලීම පුද්ගලානු බද්ධ සිදුවීමක් සම්බන්ධව නොවන අතර මේ රටේ ප්‍රජාතන්ත්‍රවාදය සුරක්ෂිත කිරීම උදෙසාත් මැතිවරණ කොමිෂන් සභාවේ ස්වාධීනභාවය ආරක්ෂා කිරීම උදෙසා රාජ්‍ය නිලධාරීන්ට ස්වාධීනව කටයුතු කිරීමට අවශ්‍ය පරිසරය නිර්මාණය කිරීම උදෙසාත් වන බව කාරුණිකව සඳහන් කරමින් මේ සම්බන්ධයෙන් ඔබ ගනු ලබන තීරණ මේ රටේ ප්‍රජාතන්ත්‍රවාදය පිළිබඳ හැරවුම් ලක්ෂයක් වනු ඇති බවට සඳහන් කරමි.
මෙම සිදුවීම රටේ ප්‍රජාතන්ත්‍රවාදය කෙරෙහි තීරණාත්මක තත්ත්වයක් උද්ඝත කරවන බැවින් රටේ මහජනතාවගේ දැනගැනීම පිණිස සියලුම මාධ්‍ය වෙත මෙම ලිපිය නිකුත් කරන බවද දන්වා සිටිමි.
ස්තුතියි,
මෙයට විශ්වාසී,
රෝහණ හෙට්ටිආරච්චි
විධායක අධ්‍යක්ෂ.
පිටපත් :
සභාපති, රාජ්‍ය සේවා කොමිෂන් සභාව.
සියලුම මාධ්‍ය ආයතන.
උනන්දුවක් දක්වන සෙසු පාර්ශව.
