ආපදා සහන ලබා දෙන බව පවසමින් සිදුකරන වංචනික ක්‍රියාවලට නොරැවටෙන මෙන් ආපදා කළමනාකරණ මධ්‍යස්ථානය ජනතාවගෙන් ඉල්ලීමක් කරනවා.
ඒ නුවරඑලිය දිස්ත්‍රික්කයේ වලපනේ ප්‍රාදේශීය ලේකම් කොට්ඨාශයේ පදිංචිකාරිනියකගේ නිවසට ආපදා කළමනාකරණ මධ්‍යස්ථානයේ නිළධාරියකු යැයි පවසා ඇයගේ නිවසට වු හානිය වෙනුවෙන් රුපියල් ලක්ෂ පහක මුදලක් අනුමත වී ඇති බව පවසා සිදුකිරීමට ගිය වංචාවක් පිළිබඳ හෙළිවීමත් සමගයි.
එම මුදල ලබා ගැනීමට නම් යම් මුදල් ප්‍රමාණයක් තැන්පත්කළ යුතු බව පවසා ඇති අතර කාන්තාව සන්තකයේ මුදල් නොමැති වූ බැවින් අදාළ පුද්ගලයා විසින් නිවෙස් හිමි කාන්තාව සතු රන් මාලය රැගෙන ගොස් පසු දින දිස්ත්‍රික් ආපදා කළමනාකරණ ඒකකයට පැමිණෙන ලෙස ද දන්වා ඇති බව සදහන්.
ඒ අනුව ඊයේ දින අදාල නිවෙස් හිමි කාන්තාව ඇයට හිමි වන්දි මුදල් ලබාගැනීම සදහා නුවරඑලිය දිස්ත්‍රික් ලේකම් කාර්යාලයේ පිහිටි දිස්ත්‍රික් ආපදා කළමනාකරණ සම්බන්ධීකරණ ඒකකය වෙත පැමිණ තිබෙනවා. නුවරඑලිය දිස්ත්‍රික් ආපදා කළමනාකරණ සහකාර අධ්‍යක්ෂ විසින් මේ සම්බන්ධයෙන් පොලීසියට පැමිණිලි කර ඇති අතර මෙම සිදුවීම වංචනික ක්‍රියාවක් වන බවයි ආපදා කළමනාකරණ මධ්‍යස්ථානය නිවේදනය කළේ.
මහජන සේවා සැපයීමේ දී කිසිදු මුදලක් මහජනතාවගෙන් අය නොකරන බවද එම නිවේදනයේ සදහන්. එවැනි තවත් පුද්ගලයින් වාර්තා වුවහොත් ලගම පිහිටි පොලිස් ස්ථානය දැනුවත් කරන ලෙසද ආපදා කළමනාකරණ මධ්‍යස්ථානය ජනතාවගෙන් ඉල්ලීමක් කරනවා.
