ආදායමට වඩා ණය පොලී ගෙවන රටවල් අතරින් ශ්‍රී ලංකාව දෙවන ස්ථානයට පත්ව ඇති බව සමගි ජන බලවේගයේ පාර්ලිමේන්තු මන්ත්‍රී එරාන් වික්‍රමරත්න මහතා පවසනවා.
මෙය රටේ මූල්‍ය තත්වය පිළිබද කණගාටුදායක තත්වයක් බවයි මන්ත්‍රිවරයා පෙන්වා දෙන්නේ.
ඔහු මෙම අදහස් පළ කළේ 2020 වාර්ෂික මහ බැංකු වාර්තාව පිළිබද පාර්ලිමේන්තුවේ ඊයේ පැවති විවාදයට එක්වෙමින්.
රටේ මූල්‍ය ස්ථාවරත්වය නිවැරදි දිශාවට ගැනීම සදහා මුදල් අමාත්‍යංශය අවශ්‍ය ප්‍රතිපත්තිමය තීරණ ගනිමින් සිටින බව ආණ්ඩු පක්ෂයේ මන්ත්‍රී මහාචාර්ය රංජිත් බණ්ඩාර මහතා ඊයේ විවාදයේදී සදහන් කළා.
සමගි ජන බලවේගයේ මන්ත්‍රී අශෝක අබේසිංහ මහතාද විවාදයේදී අදහස් දැක්වූ අතර විදේශ සංචිත ප්‍රමාණය අඩුවීමෙන් රට මුහුණ දී ඇති අවදානම් තත්වය පිළිබද ඔහු මෙලෙස පැහැදිලි කළා.
විවාදයේ පිළිතුරු කථාව කරමින් වෙළඳ අමාත්‍ය බන්දුල ගුණවර්ධන මහතා කියා සිටියේ රාජ්‍ය මූල්‍ය පිළිබද දැවැන්ත අර්බුදයට අද වනවිට රට මුහුණ දී ඇති බවයි. ඒ හරහා උද්ගතවන ගැටලූවල යථාර්ථය විපක්ෂයද පිළිගත යුතු බවයි අමාත්‍යවරයා සදහන් කළේ.
මේ අතර ඡන්ද හිමියන් ලියාපදිංචි කිරීමේ සංශෝධන පනත් කෙටුම්පත සහ සේවකයින්ගේ ජාතික අවම වේතනය පනත් කෙටුම්පත අද පාර්ලිමේන්තුවේදී විවාදයට ගැනීමට නියමිතයි.
