පාර්ලිමේන්තුවේදී තම මන්ත්‍රීවරුන්ට දිගින් දිගටම සිදුවන අසාධාරණය සම්බන්ධයෙන් අන්තර් පාර්ලිමේන්තු සංගමය ඇතුලු ජාත්‍යන්තර සංවිධාන තුනකට පැමිණිලි කිරීමට සමගි ජනබලවේගය තීරණය කර තිබෙනවා.
ඒ අනූව පොදුරාජ්‍ය මණ්ඩලයීය පාර්ලිමේන්තු සංගමයට / සාර්ක් පාර්ලිමේන්තු සංගමයට සහ අන්තර් පාර්ලිමේන්තු සංගමයට මේ සම්බන්ධයෙන් පැමිණිලි කිරීමට තීරණය කල බවයි අද පැවති මාධ්‍ය හමුවකට එක්වෙමින් සමගි ජනබලවේගයේ මහ ලේකම් පාර්ලිමේන්තු මන්ත්‍රී රංජිත් මද්දුමබණ්ඩාර මහතා කියා සිටියේ.
මන්ත්‍රීවරුන්ගේ ආරක්ෂාව තහවුරු කෙරෙන තෙක් නැවතත් පාර්ලිමේන්තුවට සහභාගී නොවන බවත් අද දහවල් මෙම සිදුවීම සම්බන්ධයෙන් කථානායකවරයා සමග නැවත වරක් සාකච්ඡා කරන බවත් මන්ත්‍රීවරයා සඳහන් කලා.
පාර්ලිමේන්තුවේ මැති ඇමතිවරුන් ඔවුන්ගේ කථා තුලදී පළකරන අදහස් සම්බන්ධයෙන් කථානායකවරයා හෝ එම ආසනයේ සිටින නිළධාරීන් අවධානය යොමු නොකිරීම වත්මන් පාර්ලිමේන්තුවේ ඇති විශාල දුර්වලතාවයක් බවයි මෙම මාධ්‍ය හමුවට එක්වූ පාර්ලිමේන්තු මන්ත්‍රී ලක්ෂ්මන් කිරිඇල්ල මහතා අවධාරණය කලේ.
