ශ්‍රී ලංකා මහ බැංකුවේ අධිපති නන්දලාල් වීරසිංහ මහතා එම ධූරයෙන් ඉවත් කිරීමට තීරණයක් ගෙන ඇත්නම් එම තීරණය ඉවත් කරගන්නා ලෙස ශ්‍රී ලංකා පොදුජන පෙරමුණේ කොළඹ දිස්ත්‍රික් පාර්ලිමේන්තු මන්ත්‍රී ජගත් කුමාර සුමිත්‍රාආරචිචි මහතා අගමැති රනිල් වික්‍රමසිංහ මහතාගෙන් ඉල්ලීමක් කරනවා.
අගමැතිවරයා වෙත ලිපියක් යවමින් මන්ත්‍රීවරයා පෙන්වා දෙන්නේ රජයට එරෙහිව විවිධ විරෝධතා මතුවී ඇති අවස්ථාවක එවැනි ක්‍රියාමාර්ගයක් ගතහොත් ආණ්ඩුවට එරෙහිව විරෝධය තවත් වැඩිවිය හැකි බවයි.
මහ බැංකු අධිපතිවරයා ඉදිරි දිනවල එම තනතුරින් ඉවත් කිරීමට යන බවට ඇතැම් සමාජ මාධ්‍ය ජාලවල ප්‍රචාරය වෙමින් පවතින බවත් මෙවැනි ප්‍රචාර විශ්වාස කරමින් ජනතාව කලබල වුවහොත් රටේ අවුල් සහගත තත්වයක් ඇති වනු ඇති බවත් ජගත් කුමාර මහතා සඳහන් කරනවා.
ආර්ථික අර්බුදය දේශපාලඥයන්,මහ බැංකු අධිපතිවරුන් සහ හිටපු ඇතැම් නිලධාරීන්ගේ අදූරදර්ශී තීරණ හා වැඩපිළිවෙළ නිසා සිදු වූ බවට ජනතාව තුළ විශාල කලකිරීමක් ඇතිවූයේ යැයි පවසන ජගත් කුමාර මහතා රටපුරා පසුගියදා විශාල කලබලකාරී තත්වයක් ඇතිවූයේද මෙම කලකිරීම හේතුවෙන් බවත් ප්‍රකාශ කරනවා.
