ආහාර ඇතුලු අත්‍යවශ්‍ය ද්‍රව්‍ය මිළයට ගැනීමට අමෙරිකානු ඩොලර් බිලියනයක ණයක් සහ ඉන්ධන මිළයට ගැනීමට ඩොලර් මිලියන 500 ක ණයවර ලිපි නිකුත් කිරීම සම්බන්ධයෙන් ශ්‍රී ලංකා මුදල් අමාත්‍ය බැසිල් රාජපක්ෂ සහ ඉන්දීය විදේශ අමාත්‍ය එස් ජයිශංකර් මහත්වරුන් සාකච්ඡාවක් පවත්වා තිබෙනවා.
ඒ අද පෙරවරුවේ අන්තර්ජාලය ඔස්සේ පැවති සාකච්ඡාවකදීයි.
ශ්‍රී ලංකාවේ විශ්වසනීයම රාජ්‍යය ලෙස අඛණ්ඩව පෙනී සිටින බවයි ඉන්දීය විදේශ අමාත්‍යවරයා මෙහිදී අවධාරණය කර ඇත්තේ.
ඩොලර් මිලියන 400 ක විනිමය හුවමාරුව දීර්ඝ කිරීම සම්බන්ධයෙන්ද අමාත්‍යවරුන් දෙදෙනා අදහස් හුවමාරු කරගෙන තිබෙනවා.
ත්‍රිකුණාමලය තෙල් ටැංකි සංකීර්ණය සංවර්ධනය සම්බන්ධයෙන් ප්‍රසාදය පළකල ඉන්දීය විදේශ අමාත්‍යවරයා අවධාරණය කර ඇත්තේ අතිශය වැදගත් මෙම අවස්ථාවේදී සෙසු ජාත්‍යන්තර හවුල්කරුවන් සමගද එක්ව ශ්‍රී ලංකාවට සහයවීම ඉන්දියාවේ අපේක්ෂාව බවයි.
ශ්‍රී ලංකාවේ ආර්ථිකය ශක්තිමත් කරන ඉන්දීය ව්‍යාපෘති සහ ආයෝජන සැළසුම් සම්බන්ධයෙන්ද දෙපාර්ශවය අතර අදහස් හුවමාරු කරගෙන තිබෙනවා.
මානුෂීය පදනමින් සළකා දැනට ශ්‍රී ලංකා අත්අඩංගුවේ පසුවන ඉන්දීය ධීවරයන් හැකි ඉක්මණින් නිදහස් කරන ලෙසයි ඉන්දීය විදේශ අමාත්‍ය එස් ජයිශංකර් මෙම සාකච්ඡාවේදී ශ්‍රී ලංකා මුදල් අමාත්‍ය බැසිල් රාජපක්ෂ මහතාට දන්වා ඇත්තේ.
